Ч.ЗОТОЛ

Гама Гаржүд Үржинпэрэнлайлин хийдийн тэргүүн Д.Тайвансайхан Бурхан багшийн дүйчин өдөрт зориулан магтаалын өргөл өргөжээ. Энэ өдрийн утга учрын тухай түүнээс тодрууллаа.  

-Бурхан багшийн магтаал өргөжээ. Ямар утгатай магтаалаар өргөл өргөдөг вэ?

-Гайхамшигт Бурхан багш дор мөргөж, магтаалаар нь магт юу гээд

“Тавхай түгжээ шанжий рэгтүн шин

Санжий мятав дүджий бүншин ба

Сэржээ лхүнбүү давар жидбий гү

Шагжаан жалбу дэла чанцаалоо”  гэж уншдаг  Бурхан багшийн  магтаал   бий.

Энэ нь  “Мэргэн аргын хүчээр бусдын язгуурыг эрхшээсэн

Хэмжээлшгүй хүчээр шимнусын омгийг дарсан

Алтан уул мэт сүр жавхланг илтгэсэн биет

Шагжаан хаан түүн дор мөргөмүй” гэсэн утгатай.

-Энэ өдөр юуг тэвчиж, юунд анхаарвал зохилтой вэ?

-Аугаа энэрэн нигүүлсэхүйгээр  эх болсон зургаан зүйл хамаг амьтны тусын тулд асрал хайрыг айлдсан бурхан багшийн номыг тахиж шүтдэг болсон миний ард түмэн хувьтай. Дэлхий дахинд хүндлэгдэн шүтэгдэж байгаа энэхүү шашнаа дээдлэн суралцаж, өөртөө мөрдлөг болгох аваас ахуй амьдралд нэн хэрэгтэй. Энэ өдөр амьтны амь таслахыг тэвчин цагаан хоолоор мацаг барьж, өглөг асралыг эрхэмлэн, ерөөл тарниа уншиж буянаа арвижуулахад хичээвэл зохилтой.

-Хүмүүст хандаж та юу хэлэх вэ?

-Энэ өдөр хийсэн буян, Бурханы сургааль номын аврал хүн бүрт үргэлж хүрч, эрүүл энх, барцад саадгүй байх болтугай. Хураасан буянаар чинь санасан бүхэн номын ёсоор ёсчон бүтэх болтугай.

Эх сурвалж:www.polit.mn