Б.ДОЛЖИНЖАВ

Манай улс цус, цусан бүтээгдэхүүний нөөцийн хомсдолд ороод байгаа талаар Цус сэлбэлт судлалын үндэсний төвөөс өнөөдөр мэдээллээ. Хөл хорионы улмаас цусны донорын тоо тус төвийн хэмжээнд 31 хувь, цус цусан бүтээгдэхүүний үйлдвэрлэл 20 хувиар буурчээ.

Энэ талаар Цус сэлбэлт судлалын үндэсний төвийн Ерөнхий захирал Н.Эрдэнэбаяр "Цус, цусан бүтээгдэхүүнийг төрөхийн хүндрэл, автын осол, гэмтлийн үед, зүрх судас, хавдрын өвчлөл болон эрхтэн шилжүүлэн суулгах хагалгаа зэрэгт хэрэглэдэг. Тухайлбал элэг шилжүүлэн суулгах хагалгааны цус, цусан бүтээгдэхүүний захиалгыг 500 орчим донороос бэлтгэдэг. Долоо хоногт 2-3 элэг шилжүүлэн суулгах хагалгаа хийж байгаа. Жил болгон цус, цусан бүтээгдэхүүний захиалга эрэлт нэмэгдэж байгаа тул донорын тоог нэмэгдүүлж байж хэрэгцээгээ хангана. 2021 оны эхний дөрвөн сарыг өмнөх онуудтай харьцуулахаар их буурсан үзүүлэлттэй гарсан. Цусны нөөцийн асуудлыг улаан эсийн бүтээгдэхүүн дээр түлхүү ярьдаг” гэж ярилаа.

Цус сэлбэлт судлалын үндэсний төв нь Улаанбаатар хотын хэмжээнд улсын болон хувийн 80 гаруй эмнэлэгт үйлчилдэг. Одоогоор эмнэлгийн захиалгыг бүрэн хангаж байгаа ч улаан эсийн бүтээгдэхүүний хувьд 3-5 хоногийн нөөцтэй байгаа аж. Тиймээс иргэд, ААН-үүд цусаа хандивлахыг Цус сэлбэлт судлалын үндэсний төвөөс уриаллаа.

Эх сурвалж:www.polit.mn