Ч.ЗОТОЛ

Монгол Улсын Ерөнхийлөгчийн зарлигийн дагуу Үндэсний бичиг үсгийн баярыг тохиолдуулан Сүхбаатар аймгийн яруу найрагчид, зохиолчдынхоо бүтээлээс сэдэвлэсэн "Жаахан шаргын нутаг" монгол бичгийн онлайн уралдааныг “Титэм-Арт” академийн санаачлагаар Сүхбаатар аймгийн Боловсрол, соёл урлагийн газар, Баруун-Урт сумын ЗДТГ-аас дөрөвдүгээр  сарын 12-ноос энэс  сарын 1-ний хооронд зохион байгуулжээ.  Тэмцээний ялагчдад өнөөдөр шагналыг нь гардууллаа.

Тус уралдааны “Үзгийн хичээнгүй бичиг”, “Бийрийн хичээнгүй бичиг”, “Уран бичлэг”, “Таталган бичиг”  төрөлд  39 байгууллагын 390 албан хаагч, 15 сургуулийн 225 сурагчийн хичээнгүй бичвэр, мэргэжлийн 46 багшийн хичээнгүй бичвэр, тайлан, 40 гаруй уран бүтээлчийн бүтээлийг хүлээн авч нийт дөрвөн төрөл,  дөрвөн ангиллаар 21 байр шалгаруулжээ.

Монгол орны өнцөг булан бүрт ажиллаж амьдарч буй Сүхбаатар аймгийн харъяат иргэн, оюутан залуус, уран бүтээлчид зорин оролцсон нь энэхүү уралдааны онцлог байв.  Эх хэлний багш нар сурагчдаа бэлтгэн оролцуулахын зэрэгцээ албад байгууллагуудыг хариуцан, 20 хоногийн хугацаанд хамтран ажиллаж, онлайн орчинд хичээл зааж, удирдан чиглүүлж, хичээнгүй бичигт сургаж, албан хаагчдын бичих чадварт ахиц гаргасан нь хамгийн чухал үр дүн байлаа.

Эх хэл, бичиг соёлоо эрхэмлэн дээдэлж, түгээн дэлгэрүүлэх зорилго бүхий уг уралдааныг Баруун-Урт сумын ЗДТГ, Чингис хаан одонт, МУСГЗ, зохиолч, яруу найрагч Г.Мэнд-Ооёо ”Лүгцил” компанийн захирал Ж.Ариунжаргал нар ивээн тэтгэсэн байна.

Уралдааны хүрээнд Титэм-Арт академийн тэргүүн, Урлаг судлалын докторант, дэд профессор, уран бичээч Э.Ариунболд нь багш нартаа дэмжлэг үзүүлж,  15 багшийг бийрийн бичгийн онлайн сургалтад үнэ төлбөргүй хамрагдах  боломжийг олгосон нь төрөлх нутгийнхаа эх хэлний багш нарын мэргэжлийн ур чадварыг дээшлүүлэхэд томоохон хувь нэмэр болсон байна.

Эх сурвалж: www.polit.mn