Б.ТУУЛ

Нийслэлийн Засаг дарга бөгөөд Улаанбаатар хотын Захирагч Д.Сумъяабазар ажил үүргээ гүйцэтгэж байхдаа коронавирусын  халдвар авч эдгэсэн болон эмчлүүлж байгаа эмнэлгийн ажилтан, алба хаагчдад дархлаа дэмжих багц хүргүүллээ. Нийслэлийн Засаг даргын зөвлөх Б.Мягмар эрүүл мэндийн салбарт эрсдэлтэй нөхцөлд ажиллаж байгаа алба хаагчдыг эрүүл мэнддээ анхаарч ажиллахыг хүсээд,  ХӨСҮТ болон Нийслэлийн түргэн тусламжийн төвийн эмч, эмнэлгийн ажилтнуудын төлөөлөлд дархлаа дэмжих багцыг гардуулсан юм. Энэ үеэр ХӨСҮТ-ийн Эмчилгээ эрхэлсэн дэд захирал Ц.Чинбаяр, Нийслэлийн түргэн тусламжийн төвийн дарга Т.Пүрэвдаш “Коронавируст халдвар төдийлөн буураагүй энэ үед ард иргэдээ халдвар хамгааллын дэглэмээ сайтар сахиж, мэргэжлийн байгууллагаас өгч байгаа заавар, зөвлөмжийг дагахыг хүсэж байна. Мөн,  “Цар тахлын үед нийслэлийнхээ иргэдийн төлөө цаг наргүй ажиллаж байгаа эмч, эмнэлгийн ажилчдын дархлааг дэмжиж, дэмжлэг үзүүлж байгаад талархал илэрхийлье. Ажлаа хийж байгаад халдвар авсан эмч, ажиллагсадынхаа дархлааг дэмжих, сэтгэл зүйн дэмжлэг үзүүлэх нь бидний хувьд бас нэн чухал зүйл байсан” гэдгийг хэлсэн юм.   Нийслэлийн Засаг даргын зөвлөх Б.Мягмар Хан-Уул дүүргийн Эрүүл мэндийн төв, Баянгол дүүргийн Эрүүл мэндийн төвийн алба хаагчдад дархлаа дэмжих багцыг гардуулсан байна.

Эх сурвалж: www.polit.mn