Б.ДОЛЖИНЖАВ

ЭМЯ-ны ээлжит хэвлэлийн хуралд Эрүүл мэндийн сайд асан, Анагаах ухааны доктор А.Цогцэцэг оролцож, мэдээлэл өглөө. 

Тэрбээр "Манай улс 10 гаруй өвчнөөс сэргийлэх долоон төрлийн товлолт вакциныг хийдэг. Үүний үр дүнд өвчлөлөөс 95-98 хувиар хамгаалж байгаа. Вакцин бол хамгийн аюулгүй бөгөөд үр дүнтэй хамгаалалт юм. Бид хүүхдүүдэдээ хоёр хоногтойгоос эхлүүлээд 15 нас хүртэл нь долоон төрлийн товлолт вакцин хийлгэдэг. Өнөөдөр "вакцин хэрэгтэй, хэрэггүй" гэх олон төрлийн мэдээлэл гарч байна. Вакцин хийлгэх эсэх нь хүний эрхийн асуудал мөн боловч таны эрхээр бусдын эрх хязгаарлагдах ёсгүй гэдгийг зөв ойлгоорой. Вакцин тухайн өвчнөөс урьдчилан сэргийлэх, хүндрэлийг багасгах боломжийг бүрдүүлж өгнө. Хоёр тунгаар вакцин хийлгэсний дараа хүний биед 75-95 хувьтай дархлаа тогтоно гэдгийг шинжлэх ухаан нотлоод өгчихсөн. Вакцин үйлдвэрлэлт 98 жилийн түүхтэй бөгөөд Vero Cell вакциныг уламжлалт аргаар хийсэн. Тиймээс бид төрдөө, эрүүл мэндийн байгууллагадаа итгээд вакциндаа хамрагдах ёстой. Бид долоодугаар сарын 15 гэхэд найз нөхөд, гэр бүлийнхэнтэйгээ амны хаалтгүй уулзахын тулд вакциндаа хамрагдах хэрэгтэй байна Архаг суурь өвчтэй хүмүүст вакцины эсрэг заалт бараг байхгүй. Хамгийн гол нь хурц буюу сэдрэлийн үед нь хийхгүй. Намжмал үед нь вакцин хийж болно" гэж: ярилаа.

Эх сурвалж:www.polit.mn