Б.ОД

Монгол Улсад  өнөөдрийн байдлаар 6615 хүүхэд COVID-19 халдвар авсан нь тогтоогдоод байна. Энэ нь нийт өвчлөгчдийн 20 орчим хувийг хүүхэд эзэлж байгаа нь бусад оронтой харьцуулахад өндөр үзүүлэлт юм. Хүүхдүүдийн дунд өвчлөл өндөр түвшинд байхад танхимын хичээлийг эхлүүлэх нь халдвар хурдацтай тархах эрсдэлтэй. Тиймээс ирэх намар хичээл, сургалтын үйл ажиллагаагаа хэвийн горимд шилжүүлэхийн тулд хүүхдийн вакцинжуулалтад өнөөдрөөс бэлдэх шаардлагатай байгааг БШУЯ-аас санууллаа.

Одоогийн байдлаар Файзэр, Модерна, Жонсон-Жонсон зэрэг компаниудын хүүхдийн вакцины туршилт амжилттай болж байгаа талаар мэдээлж байна.Тиймээс вакцин худалдаж авах эх үүсвэрийг эртнээс бэлдэх, вакцин үйлдвэрлэгчдэд захиалгаа эрт өгөх, тээвэрлэлт, ложистикийн төлөвлөлтийг нарийвчлах, түгээлт, вакцинжуулалтыг хурдтай, оновчтой зохион байгуулах шаардлагатай  тул дараах саналыг холбогдох газруудад хүргүүлэв.

Үүнд тавдугаар сард багтаан хүүхдийн вакцин худалдаж авах эх үүсвэрийг Засгийн газраас шийдвэрлэх, зургаагаас долдугаар сард багтаан вакцин үйлдвэрлэгчидтэй гэрээ байгуулах, захиалах есөөс аравдугаар дугаар сард багтаан вакциныг оруулж ирэх, вакцинжуулалтыг эхлүүлэх саналыг Боловсрол, шинжлэх ухааны яамнаас гаргалаа.

Эх сурвалж:www.polit.mn