Б.ДОЛЖИН

Азийн хөгжлийн банкнаас жил бүр эрхлэн гаргадаг Азийн Хөгжлийн Төлөв эдийн засгийн шинжилгээ, төсөөллийн энэ жилийн тайлангаа өнөөдөр танилцууллаа. Тайланд дурдсанаар Монгол Улсын эдийн засаг 2020 оны 5.3 хувийн огцом  бууралтаас сэргэж 2021 онд 4.8 хувиар, 2022 онд 5.7 хувиар өснө гэсэн таамаглал гарчээ. Гэвч нийт хүн амын 60 хувийг вакцинжуулах хүртэл эдийн засгийн сэргэлт харилцан адилгүй, тэнцвэртэй бус байхаар байна. Тухайлбал, вакцинжуулалт удаашрах, цар тахлын эдийн засаг дахь сөрөг үр дагавар илүү удаан хугацаанд үргэлжлэх, хөрөнгө оруулалтын орчин улам муудах зэрэг эрсдэл байгаа юм.

Энэ талаар АХБ-ны Монгол Улс дахь Суурин төлөөлөгч Павит Рамачандран  “Монголын эдийн засаг цар тахлын өмнөх гурван жилд тогтвортой өссөн боловч цар тахлын сөрөг нөлөөгөөр 2020 онд аж үйлдвэрлэл, хөрөнгө оруулалт буурч дотоодын нийт бүтээгдэхүүн сүүлийн 11 жилд анх удаа буурлаа. Үүнээс болж иргэдийн эрүүл мэндийг хамгаалах, нийгмийн хамгааллын арга хэмжээг хэрэгжүүлэх, ажлын байрыг хамгаалж ажил эрхлэлтийг дэмжих, санхүүгийн тогтвортой байдлыг хангах чиглэлээр хариу арга хэмжээ нэн яаралтай авах шаардлагатай болсон.Энэ хүнд цаг үед Монгол Улсын иргэдийн эрүүл мэндэд учрах аюулыг бууруулахын тулд цар тахлын менежментийг илүү үр дүнтэй хэрэгжүүлж, вакцины хангамж, нийлүүлэлтийг яаралтай баталгаажуулах шаардлагатай байна. Эдийн засгийг идэвхжүүлэх зорилготой аливаа хөтөлбөр, түүний санхүүжилтийн схемийг оновчтой боловсруулж, зөв төлөвлөн хэрэгжүүлэх нь чухал. Үгүй бол эдийн засгийн сэргэлтэд сөрөг үр дагавар үүсэж болзошгүй” гэв.

Эх сурвалж:www.polit.mn