Б.ОД
Эрүүл мэндийн ажилтны ҮЭХ-ноос "ХӨСҮТ-ийн эмч нар PCR шинжилгээг хуурамчаар үйлддэг үү" гэсэн сэдвээр хэвлэлийн бага хурал хийлээ Хуралд PCR шинжилгээг хуурамчаар үйлддэг гэж нэр цохсон эмч нарын төлөөлөл оролцсон юм.
ХӨСҮТ-ийн үйлдвэрчний хорооны дарга О.Баатарчулуун “ХӨСҮТ-д Тагнуул, эдийн засгийн гэмт хэрэгтэй тэмцэх газраас хийсэн шалгалттай холбоотойгоор Livetv.mn сайтад эмч нарыг буруутгасан нэвтрүүлэг гарсан. Бодит байдлаас илт гуйвуулсан энэ нэвтрүүлэг ХӨСҮТ-ийн ажилчдад том цохилт болж, сэтгэл санааны маш хүнд байдалд орлоо. Цахим хаягуудаар 50 мянган хүний хариуг 80 мянган төгрөгөөр сөрөг гаргасан гэх мэдээлэл гарч байна. Энэ бол зохион байгуулалттай улс төрийн гүтгэлэг гэж харж байна. Шинжилгээг бар кодоор оруулдаг, бүх хариу автомат машин дотор хадгалагддаг. Тиймээс өөрчлөх ямар ч боломжгүй. Gerege систем рүү нэгэнт орсон мэдээллийг манайхаас ч, gerege системээс ч өөрчилж чадахгүй. Хууль хяналтын байгууллагаас яаралтай дүгнэлт гаргаж зөв бурууг нь олох хэрэгтэй. Хэрэв үнэхээр тийм зүйл болсон бол үндэсний хэмжээний гэмт хэрэг. Бид ажлаа хийх ямар ч хүч тэнхэлгүй боллоо. Цар тахлын үед хоёр жил зүтгэчхээд хийсэн ажлынхаа хариуд яагаад буруутгагдаж байгаа юм бэ. ХӨСҮТ-д ажиллаж байгаа эмч нарыг буруутгаж байгааг хүлээн зөвшөөрөхгүй. Цар тахлын голомтод ажиллаж байгаа төрийн алба хаагчид, эмч нар халдвар авч нас барж эхэлсэн” гэж ярилаа.
Харин эмч нарын төлөөлөл “Шинжилгээ авсан эмч нар хариуг нь өөрчилж чадахгүй. Энэ асуудлыг хууль хяналтын байгууллагаар шийдвэрлүүлэх хэрэгтэй. ПСР шинжилгээ маш нарийн явцтай. Шинжилгээг өдөр нь аваад шөнө нь шинжилдэг. Лаборатори руу орсон шинжилгээг хэн ч өөрчилж чадахгүй.Энэ бол зөвхөн цөөн хэдэн хүмүүсийн эсрэг бус эрүүл мэндийн байгууллагын нэр хүндийг унагасан хэрэг” гэсэн юм.
Эх сурвалж:www.polit.mn