Б.ОД
Алдарт Forbes сэтгүүл жил бүр уламжлал болгон 30 хүртэлх насны залуу удирдагчийг тодруулдаг “30 under 30 Asia 2021” жагсаалтад Засгийн газрын агентлагийн хамгийн залуу, анхны эмэгтэй удирдагчийн нэг Харилцаа холбоо, мэдээллийн технологийн газрын дарга Б.Болор-Эрдэнэ шалгарчээ.
Дэлхийн өнцөг булан бүрээс өрсөлдсөн шилдэг 2500 гаруй залуугаас Forbes сэтгүүлийн баг А зэрэглэлийн шүүгчдийн бүрэлдэхүүний хамт 30 залуу манлайлагчийг тодруулдаг. Дээрх 30 залууг хямралыг боломж болгон харсан тууштай байдал, шаргуу хөдөлмөр, инновацын хосгүй жишээ хэмээн нэрлэжээ.
Б.Болор-Эрдэнэ нь Монгол Улсыг “Цахим Үндэстэн” болгох таван жилийн төлөвлөгөөг боловсруулж, цар тахлын хүнд үед иргэдийн хамгийн их авдаг төрийн 181 үйлчилгээг E-Mongolia системд нэгтгэн, цахимжуулах ажлыг санаачилсан юм. Тэрбээр Английн Оксфордын их сургуульд нийтийн удирдлагын чиглэлээр суралцаж, Дэлхийн банк, НҮБ, Азийн хөгжлийн банканд ажиллаж байсан залуу удирдагчдын нэг юм.
Эх сурвалж:www.polit.mn