Б.ДОЛЖИН

ХӨСҮТ-ийн нэр бүхий эмч, ажилчид хуурамч шинжилгээний хариу үйлддэг гэсэн мэдээлэл амралтын өдрүүдээр цацагдсан. Энэ  асуудалд тус төвийн захирал Л.Баттөр тайлбар өглөө.

 Тэрбээр "Нэг хаалга-Нэг шинжилгээ үйл ажиллагаанаас хойш тодорхой тооны ажилтан, албан хаагчийг хууль хяналтын байгууллагаас шалгаж байгаа. Шалгалтын үйл явц одоог хүртэл үргэлжилж байна. Гэхдээ ХӨСҮТ-ийн нэр дээр "Тийм тийм хүмүүсийг шалгаж байна,  энэ хүмүүст арга хэмжээ авлаа" гэсэн зүйл хуулийн байгууллагаас албан ёсоор ирээгүй. Тиймээс ямар албан тушаалтан, эмч мэргэжилтнийг шалгаж байгааг хэлэх боломжгүй. Хууль хяналтын байгууллага эцэслэн тогтоогоогүй бол хэнийг ч буруутай гэж үзэх боломжгүй. Алдаа гаргасан байж магадгүй цөөн хүнээс болж ХӨСҮТ-ийн 850 гаруй эмч, мэргэжилтэн, эрүүл мэндийн салбарынхны нэр хүндэд халдаж байгаад бид сэтгэл дундуур байгаа. Хэвлэл мэдээллийн хэрэгсэл, олон нийтийн сүлжээгээр батлагдаагүй мэдээллийг цацаж, ард иргэдийн итгэл үнэмшлийг үгүй хийж байгаагаас үүдэн ажилтан, албан хаагчид маань сэтгэл зүйн хувьд хүнд байдалд байна. Цар тахал улам өргөн хүрээнд тархаж байгаа энэ үед эмч, мэргэжилтнүүд  үндсэн ажлаа хийх шаардлагатай. Тиймээс батлагдаагүй мэдээлэлд итгэж, эрүүл мэндийн салбарынханд хүнд дарамт үзүүлэхгүй байгаа ч ээ гэж хүсмээр байна. Хууль хяналтын байгууллагын шалгалтын ажил дуусахаар тодорхой арга хэмжээ авна" гэв.

Эх сурвалж:www.polit.mn