Унгар улсын гадаад худалдаа, Гадаад хэргийн сайд Петер Сийярто, Бүгд Найрамдах Казахстан Улсын Ерөнхий сайдын орлогч, Гадаад хэргийн сайд Мухтар Тлеуберди нар Олон улсын Түрэгийн академид зочилж эрдэмтэдтэй уулзжээ. Энэ үеэр тэд Хүннүгийн домогт жанжин Аттилагийн тухай “Европын эзэн Атилла” хэмээх судалгааны шинэ бүтээлийн нээлтийн еслолд оролцсон байна. Академийн дэмжлэгтэйгээр англи хэл дээр хэвлэгдсэн энэхүү номын зохиогч нь нэрт эрдэмтэн, Хүннүгийн түүхийн судлаач, Унгар улсаас Монгол Улсад суугаа Онц бөгөөд Бүрэн эрхт Элчин сайд Борбала Обрушанский юм. Энэ бүтээл тус академин дэргэдэх Алтай судлал, Түрэг судлал, Монгол судлалын холбооны ээлжит цуврал бүтээл болон хэвлэгджээ.
Унгар улсын Гадаад худалдаа, Гадаад хэргийн сайд Петер Сийярто хөрш орнуудын нийтлэг үнэт зүйлийг хамтарч судлах, буурал түүхийн жимээр холбоотой найрамдалт ард түмнүүдийн шинжлэх ухаан, соёлын холбоог бэхжүүлэх чиглэлээр тус академиас хийж гүйцэтгэсэн ажилд талархал илэрхийлэв. Үүнээс гадна талууд хоёр талын хамтын ажиллагааг улам өргөжүүлэн хөгжүүлэх, цаашид судалгааны иж бүрэн төслүүд хэрэгжүүлэхээр тохиролцжээ.
Хоёр тал 2017 онд Унгар улс олон улсын Түрэг академийн ажиглагч болж, хоёр талын соёл, боловсрол, шинжлэх ухааны хамтын ажиллагаа улам өргөжүүлэн хөгжүүлэх тааламжтай боломж бүрдсэнд сэтгэл хангалуун байгааг ийлэрхийлэв.
Эх сурвалж: “Зууны мэдээ” сонин