Б.ОД

Хүнс, хөдөө аж ахуй, хөнгөн үйлдвэрийн яам, НҮБ-ын Хүнс, хөдөө аж ахуйн байгууллага, “Сүү” ХК-ийн төлөөлөл өнөөдөр сүү бэлтгэн нийлүүлэгч малчин, фермер эрхлэгчидтэй уулзаж, үйл ажиллагаатай нь танилцлаа.

Сонгинохайрхан дүүргийн XXI хороонд байрлах “Ар гүнт марцад” хоршоо нь 2020 оны наймдугаар сараас үйл ажиллагаагаа эхэлжээ. Нийт 17 гишүүнтэй тус хоршоо нэг өдөрт өвлийн улиралд хоёр гаруй тонн, дулааны үед гурван тонн сүү бэлтгэж, “Сүү” ХК-д нийлүүлдэг байна. Иргэд ийнхүү нэгдэж, хоршооны системээр ажилласнаар сүүний чанар сайжирч, тэр хэрээр үнэлгээ нь ч нэмэгддэг юм.

“Сүүний урамшуулал бидэнд бодит дэмжлэг үзүүлж байна”

Монгол Улсын Засгийн газрын 130 дугаар тогтоолоор батлагдсан “Сүү боловсруулах үйлдвэр, цехэд техникийн зохицуулалтын шаардлагад нийцсэн малын түүхий сүү бэлтгэн нийлүүлсэн малчин, эрчимжсэн мал аж ахуй эрхлэгчдэд мөнгөн урамшуулал олгох журам”-ын дагуу өнгөрсөн оны арваннэгдүгээр сараас эхлэн өнөөдрийн байдлаар нийт 7792 малчин, эрчимжсэн мал аж ахуй эрхлэгчдэд гурван тэрбум гаруй төгрөгийн сүүний урамшуулал олгоод байна.

Чанарын шаардлага хангасан сүү бэлтгэн нийлүүлж байгаа малчин, фермерүүд урамшуулалд хамрагдсанаар шинээр үхэр худалдан авах, малын тэжээлийг нэмэгдүүлж, тэр хэрээр сүүний гарц, чанарыг сайжруулах зэргээр бодит дэмжлэг болж байгааг онцлон хэлсэн юм.

 Эх сурвалж:www.polit.mn