Б.ОД

Монгол Улс болон Унгар улсын Засгийн газар хоорондын хамтын ажиллагааны чухал төсөл болох Сонгино дахь “Биокомбинат” ТӨХХК-ийн шинэчлэл төсал үргэлжилж байна.

Монгол Улс сүүлийн гурван жилд шүлхий өвчнөөс сэргийлэх вакцин 19.7 сая/тун, бог малын мялзангаас сэргийлэх вакцин 32.3 сая/тун, хонийг цэцэг өвчнөөс сэргийлэх вакцин 23.6 сая/тун гадаадаас импортоор авч, нийт 7.5 сая ам. долларыг зарцуулсан байна. Биокомбинатыг шинэчилж, шинэ үйлдвэр баригдсанаар гадагшаа чиглэсэн валютын урсгалыг зогсоож, цаашид экспортлох боломж бүрдэж жилд дунджаар 10 сая тун шүлхий өвчнөөс сэргийлэх, 10-15 сая тун мялзан өвчнөөс сэргийлэх, 20 сая тун цэцэг өвчнөөс сэргийлэх вакциныг дотооддоо үйлдвэрлэх боломжтой болно. Монгол орны мал сүргийн эрүүл мэндийн үзүүлэлтүүд дээшилснээр нийгмийн эрүүл мэндэд үзүүлэх халдварын эрсдэл буурч, хүн амын хүнсний баталгаат байдлын халдвараас хамаарах аюул багасч, мал аж ахуйн гаралтай түүхий эд, бүтээгдэхүүний экспорт нэмэгдэж, малчдын амьжиргаа дээшлэх зэрэг шууд болон дам эерэг үр дүн гарах юм.

Ажлын хэсэг шинэчлэлийн үйл явцтай өнгөрсөн сарын 16-нд  танилцсан.  Энэ үеэр барилга буулгалтын ажил нэгдүгээр сард дуусч,  шинэ үйлдвэрийн барилгын концепци, технологийн схем боловсруулахад шаардлагатай мэдээллийг цаг тухайд нь бүрдүүлж өгсөн байв. Мөн барилгын эскиз зураг, тоног төхөөрөмжийн техникийн үзүүлэлт, нэр төрөл, тоо хэмжээг тохирч, нарийвчилсан зураг төслийн ажлыг эхлүүлж, шинэ үйлдвэрийн технологийн концепци зургийг шинээр боловсруулан ажиллаж байна.

Төслийн хүрээнд хийх ажил:

1. Олон улсын үйлдвэрлэлийн зохистой дадал /GMP/-ын шаардлага хангасан вирусийн гаралтай вакцин үйлдвэрлэлийн барилга шинээр барьж, өндөр хүчин чадалтай, орчин үеийн тоног төхөөрөмжөөр тоноглоно.
2. Био аюулгүйн III зэрэглэлийн шаардлага хангасан лабораторийн барилга шинээр барьж, өндөр хүчин чадалтай, орчин үеийн нарийвчлал өндөртэй лабораторийн тоног төхөөрөмж суурилуулна.
3. Үйлдвэрийн хэвийн найдвартай ажиллагааг хангах дэд бүтэц, энерги хангамж, инженерийн шугам сүлжээний өргөтгөлийн ажлыг гүйцэтгэнэ.
4. Шинэ үйлдвэр, технологи, тоног төхөөрөмж дээр ажиллах боловсон хүчний сургалт, дадлагажуулах ажлыг хэрэгжүүлнэ.

Эх сурвалж:www.polit.mn