Аялал жуулчлалыг ТЕАТР гэж үзвэл гол дүрийн жүжигчин нь ЖУУЛЧИН юм. Тэр жуулчин хаанаас ирсэн нь, хэр хол явж байгаа нь тийм чухал биш байдаг.

Өөрөөр хэлбэл Дотоод уу? Гадаад уу? гэхээс илүүтэй тухайн орон нутгийн эдийн засагт оруулж байгаа хувь нэмэр нь илүү ЧУХАЛ байдаг.

Дотоод аялал жуулчлал нь тухайн улсын иргэдэд өөрсдийн соёлын онцлог, түүх, байгалийн үзэсгэлэнт газруудынхаа үнэ цэнийг илүү ойлгуулдаг учраас ихэнхи улс орнууд бодлоготойгоор энэ төрлийн аялал жуулалчлалаа хөгжүүлсээр ирсэн байдаг.

Бас нэг заавал дурдах ёстой давуу тал бол, өөрийн эх хэл дээрээ үйлчилгээгээ авч, ханшийн зөрүүнд санаа зовох шаардлагагүйгээс гадна соёлын ялгаа гарахгүй, дээр нь ямар ч гадаад пасспорт, визний асуудалгүй тул илүү тухтай, илүү олуулаа хамрагддаг онцлогтой.

2020 оны аялал жуулчлалын улирал буюу 6-9 сард дотоодын аялал жуулчлалаас ямар үр өгөөж хүртсэн тухай зах зухаас нь хэмээн хальтхан өнгийхөд чамгүй эерэг мэдээтэй байгааг хуваалцъя гэж бодлоо.
Баян-Өлгий аймагт өнгөрсөн жил 13,000 дотоод, гадаадын жуулчид хүлээн авч байсан бол 2020 онд 25,000 жуулчин хүлээн авч хамгийн багадаа 4 тэрбум төгрөгийн орлогыг орон нутгийн эдийн засагт оруулсан байна. Энэ талаар илүү сайн, нухацтай судалвал энэ тоо өсөх нь ойлгомжтой. Учир хүнсний дэлгүүрүүдийн орлого өнгөрсөн оныхоос дунджаар 2 дахин их борлуулалттай байжээ

Дорнод аймгийн Буйр нуур орчимд үйл ажиллагаа эрхэлдэг жуулчны баазууд 2019 оныхтой харьцуулвал 2 дахин их орлого олсон амжилттай байгаа тул дараа жил дотоод, гадаадын жуулчдаа илүү тухтай, байгаль орчинд ээлтэй орчинд бас дээр нь төрөл бүрийн зугаа цэнгэл болон чөлөөт цагийн хөтөлбөрүүд санал болгохоор мэргэжлийн багаас зөвлөгөө аван нэгдсэн зохион байгуулалтанд орж байгаа юм байна.
Дундговь аймгийн тухайд өнгөрсөн жил 6,000 орчим хүн хүлээж авдаг байсан Цагаан суврагын орчимд л гэхэд 20,000 дотоодын аялагчид хүлээж авчээ. Энэ аялагчид маань тухайн нутгийн иргэдэд ямар нөлөө үзүүлснийг судалж байна.
Gobi-Caravanserai ресорт энэ жил үнэхээр тренд болж Байршлын хэрэгслийн загвар дизайн, амжилттай маркетинг дотоод аялагчдын аялах газар сонголтонд нөлөөлж болохыг харуулсан сонирхолтой жишээ боллоо.
Архангай аймгийн Статистикийн газрын мэдээлснээр:

• Хүнсний худалдааны борлуулалт 2019 онд 685 сая ₮ байсан бол 2020 онд 857 сая ₮ болж өссөн бол Хувиараа тээврийн хэрэгслийн үйлчилгээ эрхэлдэг иргэдийн орлого- 2019 онд 386,648 сая ₮ байсан бол 2020 онд 619,659 сая ₮ болж өсчээ. Эдгээр борлуулалтын дийлэнхийг тус айгийг зорьж очсон эсвэл дайраад өнгөрсөн дотоодын аялагчид оруулсан гэхэд маргахгүй биз ээ.
  Завханы Улиастай хотод ажилладаг өргөн нэрийн хүнсний бүтээгдэхүүний борлуулагчийн мэдээлж байгаагаар өнгөрсөн жилийн аялал жуулчлалын улиралтай харьцуулвал 3 дахин их борлуулалт хийсэн мэдээ байна.
  Нийт аймгуудын дунджаар орон нутгийн өргөн хэрэглээний бараа бүтээгдэхүүний борлуулалт дунджаар 35% өсөлттэй байна. (Сүлжээ дэлгүүрийн хувьд)
  Гээд зах зухаас нь харахад Дотоодын аялагчид маань боловсролын түвшингээсээ шалтгаалан муу нэр их дуулсан ч орон нутгийн эдийн засагтаа бол багахан ч гэсэн эерэг нөлөө үзүүлсэн гэж дүгнэж болохоор байна.

Гэхдээ тэд маань яагаад ийм аяллын боловсролгүй түүх, байгалийн дурсгалт газруудад хүндэтгэлгүй ханддаг вэ гээд бодоод үзэхээр Ковидоос өмнө хэн ч тэдэнд зориулж контент бэлдээд мэдлэгтэй, мэдээлэлтэй байлгахад анхаарч байгаагүй билээ. Тиймээс одоо бид “Айлаас эрэхээр авдраа ух” гэдэг үгээ бодон бодон Монгол аялагчдаа боловсруулах тал дээр хүчээ нэгтгэвэл яасан юм бэ?

Нийтлэлийг: Э.Цоморлиг

Эх сурвалж: www.joinme.mn