Б.ДОЛЖИНЖАВ

Өнөөдрийн байдлаар улсын хэмжээнд 323690 хүн COVID-19 эсрэг вакцины эхний тунд хамрагдаад байна. Гэвч эдгээрээс 532 хүн халдвар авчээ. Эхний тунгаа тариулаад халдвар авсан хүнд дараагийн тунг тарихгүй юм байна.

Энэ талаар Эрүүл мэндийн яамны хэлтсийн дарга Г.Болдмаа "Өнөөдрийн байдлаар COVID-19 эсрэг вакцин хийлгэсэн ч бүрэн дархлаа тогтож амжаагүй байгаа үедээ халдвар авсан иргэдийн тоо 532 болсон байна. Тэдгээр иргэдийг дархлаажуулалтад хамрагдсан ч халдвар хамгааллын дэглэмээ баримтлаагүй гэж үзэж байгаа.Вакцины хоёр дахь тун хийлгэснээс хойш 14 хоногийн хугацаанд дархлаа тогтох тул тэр хугацаанд маш сайн халдвар хамгааллын дэглэмээ баримтлахыг анхааруулж байна. Түүнчлэн вакцины эхний тунгаа хийлгэснийхээ дараа халдвар авсан дээрх 532 хүнд COVID-19 эсрэг вакцины хоёр дахь тунг хийхгүй. Өөрөөр хэлбэл, тэдгээр хүнд коронавирусын эмчилгээ хийж, эмчилгээний явцад эсрэг биет үүсэж буюу бүрэн эдгэрснээс 6-8 сарын дараа дахин шинээр вакцин хийх юм. Халдварын нууц үедээ байхдаа вакцин тариулсан хүнд ямар шинж илрэх талаар  ДЭМБ-аас гаргасан судалгаа одоогоор байхгүй. Гэхдээ тухайн хүн дархлаажуулалтад хамрагдаж болно. Тиймээс л халдвар хамгааллын дэглэмээ баримтлах ёстой"  гэж ярилаа.

Эх сурвалж:www.polit.mn