Б.ДОЛЖИН
Цар тахлын үед иргэд музейгээр үйлчлүүлэхдээ бэлэн мөнгө ашиглах нь халдвар тараах эрсдэлтэй учир музейнуудын тасалбарыг цахимжуулах ажлыг ойрын хугацаанд эхлүүлэхээр болжээ. Энэ хүрээнд Соёлын сайд өнөөдөр Чойжин лам сүмийн музейн үйл ажиллагаатай танилцлаа.
Энэ үеэр Соёлын сайд Ч.Номин “Өнөөдөр бид амьдралын шинэ хэв маяг руу шилжиж байна. Энэ шинэ амьдралын хэв маягтай хэрхэн хөл нийлүүлэн алхах вэ гэдгийг эртнээс төлөвлөх хэрэгтэй. Музейн хувьд хүн хоорондын зайг сайтар сахиад үйл ажиллагаагаа үргэлжлүүлэх боломжтой. Гэхдээ Чойжин ламын сүм музей орон зай багатай учир үйлчлүүлэгчдийг цөөн тоогоор оруулах, мөн төлбөр тооцооны асуудлыг цахим болгох талаар хэлэлцлээ“ гэв.
Харин Чойжин ламын сүм музейн захирал Д.Отгонсүрэн: Чойжин ламын сүм музейн хувьд одоогийн байдлаар өвлийн цагийн хувиараар ажиллаж, ням, даваа гаригт амардаг. Нийт 20 ажилтантай. УОК-оос гаргасан тушаалын дагуу ажилчдын 30 хувь буюу зургаан хүн ажиллаж байна. Чойжин ламын сүм музей Монгол Улсын хосгүй үнэт үзмэрүүдийг хадгалдаг учир сүм болгонд нэг ажилтан зогсох шаардлагатай байдаг. Музейн таван сүмд таван ажилтнаа зогсоочихоор касс, халуун хэмжигч хүн, захиргааны ажилтан маань дутагддаг. Тэгэхээр соёлын байгууллагын хувьд 30 хувьд захирагдахад хүндрэлтэй байна. Музейн үзэгч эрс буурсан. Заримдаа өдөрт 20 ч хүрэхгүй хүн ирдэг. Төсөв санхүүгийн хувьд хүндрэл үүсэхээр байна. Цар тахлын үед бид үзэгчдээ нэг газар бөөгнөрүүлэхгүй байх, аудио хөтчөө түлхүү ашиглах зэрэг арга хэмжээг авч байна“ гэсэн юм.
Уламжлалт барилга дээр үйл ажиллагаа явуулж байгаа музейнүүдэд орох, гарах хөдөлгөөнийг зохицуулалт байдаггүй, зай талбай багатай. Ийм учраас эхний орсон хүмүүсээ гарахыг нь хүлээхээс өөр арга байхгүй. Иймээс жижиг сүмүүдийн орц, гарцын асуудлыг шийдвэрлэх, үзэгчдээ хэсэгчлэн оруулах, музейн үзмэрүүдийг тайлбарлагч үйлчлүүлэгчидтэй ойроос харьцахгүй байх, аудио хөтчөө түлхүү ашиглах, халдвар гарсан тохиолдолд ямар арга хэмжээ авах тухай сургалт авах зэрэг зөвлөмжүүдийг ажлын хэсгээс өглөө.
Эх сурвалж:www.polit.mn