Б.ДОЛЖИНЖАВ

Анх 2019 оны арванхоёрдугаар сард амьтнаас хүнд халдварласан гэх COVID-19 халдварын эх үүсвэрийг тодорхойлохоор ДЭМБ-ын баг БНХАУ-ын Ухань хотноо ажиллаж байна. Ухань хотын лабораториос тархсан хэмээн таамаглаж байсан  ч амьтнаас хүнд халдварласан байж болзошгүй гэсэн судалгааны дүнгээ ДЭМБ өнөөдөр танилцууллаа. Ингэхдээ фермд өсгөж байсан зэрлэг амьтнаас эзэнд нь халдварласан байх магадлалтай гэж үзлээ. Гэвч вирусын анхны эх үүсвэр хэмээн зарласан сарьсан багваахайнаас өөр амьтанд халдаасан гэх баримтыг олсонгүй. Мөн хөлдөөсөн хүнсээр дамжин халдварласан байх боломжтой, лабораториос халдварласан байх магадлал хамгийн бага гэдгийг ДЭМБ-ын шинжээчийн багийнхан тайлбарлав.

Энэ тухай АНУ-ын Халдварт өвчнөөс урьдчилан сэргийлэх, хянах төвийн захирал асан, доктор Роберт Рэдфилд

“Халдвар анх тархсан 2019 оны арванхоёрдугаар сараас өмнө Уханийн лабораторид SARS-CoV-2 вирус тархсан гэх нотолгоо алга. Цар тахал лабораториос эхэлж халдварласан гэх ямар ч баталгаа олсонгүй. Хөлдөөсөн хүнснээс халдвар тархсан гэдэг нь ч магадлал багатай” гэж ярилаа.

Халдварын анхны тохиолдол бүртгэгдсэн Ухань хотын Хуанан далайн хүнсний зах ч цар тахлын жинхэнэ үүсвэр байх боломжгүй. Гэхдээ олон хүн цуглардаг, агаар муутай орчин учир вирусын тархалтыг хурдасгасан байж болзошгүй гэж ДЭМБ-ын шинжээчид тайландаа дурджээ.  Хүнсний захаас шинжилгээ авахад захын гадаргуугаас вирус илэрсэн ч худалдаалж байсан амьтны гаралтай хүнснээс илрээгүй байна. Тиймээс вирус Хуанан зах болон бусад захаас илрэхээс өмнө тархчихсан байсан гэж дүгнэжээ.

Энэ тухай “Эхний хэд хэдэн халдвар Хуанан болон бусад хүнсний захтай холбоотой байсан. Гэвч Хуанан зах вирусын эх үүсвэр гэж хэлэх боломжгүй. Харин халдвар хэрхэн зах руу нэвтэрсэн вэ гэдгийг олж мэдэх хэрэгтэй. Одоохондоо дүгнэлт хийх боломжгүй байна” гэж тайланд дурджээ. Тиймээс Зүүн Өмнөд Азиас гаралтай амьтдаас шинжилгээ авахыг, мөн амьтны фермийн аж ахуйнуудыг шинжлэхийг судлаачид санал болгожээ. Тухайлбал, сарьсан багваахайнаас тэжээвэр усны булга, туулай гэсэн амьтанд халдсан байх магадлал өндөр гэж үзэж байна.

Эх сурвалж:CNN