Б.ДОЛЖИНЖАВ
Шүлснээс COVID-19 халдварыг илрүүлэх шинжилгээг өнөөдрөөс (2021.3.30) Анагаахын шинжлэх ухааны үндэсний их сургууль дээр хийж эхэлнэ гэдгийг АШУҮИС-ийн профессор, анагаах ухааны доктор Д.Нямбаяр мэдээллээ.
Тэрээр "SARS- COVID-19 халдварыг шүлснээс илрүүлэх АШУҮИС-ийн эрдэмтдийн бүтээсэн ПГУ/PCR оношлуурыг ашиглах нээлтийн ажиллагаа өнөөдөр болно. Шүлснээс COVID-19 тодорхойлох оношлуурын цомог бол Монгол Улсын хувьд дотоодын оношлуур бүртгэн авсан анхны тохиолдол болсон. Мөн хамгийн тэмдэглүүштэй нь дэлхийд анхдагч оношлуурын цомог болж байгаагаараа онцлог юм. Шүлснээс COVID-19 илрүүлэх оношлуурын халдварт мэдрэг өвөрмөц чанар нь туршилтаар 100 хувийн үзүүлэлттэй гарч, шинжилгээний хариуг богино хугацаанд гаргах боломжтой болохыг тогтоосон. Мөн сорьцыг 14 хоногийн хугацаанд хадгалах бөгөөд зардал нь 2-3 дахин хямд болно" гэв.
Шүлснээс шинжилгээ авч COVID-19 илрүүлэх оношлуурын төслийг АШУҮИС-ийн эрдэмтэд 2020 оны арванхоёрдугаар сард эхлүүлж, 2021 оны гуравдугаар сард дуусгахаар ажилласан юм. Төслийг Анагаахын ухааны доктор, дэд профессор Д.Нямбаяр, Зөвлөхөөр Анагаахын ухааны доктор, АШУҮИС-ийн Боловсрол хариуцсан дэд захирал, анагаах ухааны доктор, профессор Г.Батбаатар профессор, академич Г.Болдбаатар нар АШУҮИС-ийн 10 гаруй эрдэмтэн багшийн бүрэлдэхүүнтэй ажиллаж байна. Оношлуур бүтээх төсөл амжилттай хэрэгжсэнээр COVID-19 –ийн шинжилгээ авах арга хэлбэрийг өөрчилж, шүлснээс илрүүлэх бүрэн боломжтой боллоо.
Эх сурвалж:www.polit.mn