Б.ДОЛЖИНЖАВ

Сүүлийн 24 цагийн хугацаанд Дархан-Уул аймагт COVID-19 халдварын долоон шинэ тохиолдол бүртгэгдсэн.  Үүнтэй холбогдуулан Дархан-Уул аймгийн Засаг дарга Б.Азжаргал мэдээлэл өглөө.

Тэрээр "Өвөрхангай аймгийн Хужирт сумын сувилалд хэвтэн эмчлүүлж байгаад өчигдөр шөнө 03:00 цагт Дархан-Уул аймагт ирсэн иргэдээс халдвар илэрлээ. Нийт 10 иргэн буюу есөн том хүн, нэг хүүхэд ирсэн. Одоогийн байдлаар  таван том хүний өвчлөл батлагдсан. Эдгээр хүмүүсийг аймгийн нэгдсэн эмнэлэгт тусгаарлан эмчилж байна. Эдгээр таван хүний ойрын тохиолдол болох 11 хүнийг мөн тусгаарлан ажиглаж байна. Өнгөрсөн шөнө ирсэн болохоор ойрын хавьтал маш бага.Дээрх 10 иргэнээс гадна өөр хүмүүс Хужирт суман дахь сувилалд хэвтэн эмчлүүлсэн эсэхийг судалж үзэхэд энэ сарын 12-нд  хоёр, 13-нд нэг , 17-нд дөрвөн иргэн нийт долоон иргэн хэвтэн эмчлүүлж Дархан-Уул аймаг руу буцаж ирсэн нь тогтоогдсон. Эдгээр долоон иргэнээс өнгөрсөн шөнө бас шинжилгээ авсан. Гуравдугаар сарын 12-нд ирсэн нэг гэр бүлийн хоёр иргэнээс мөн халдвар илэрлээ. Тэдгээр нь Дарханы Шарын гол сумынх. Ингээд Өвөрхангай аймгийн Хужирт суманд байрлах Сэмжид хужирт гэх сувилалд амраад ирсэн Дарханы 17 иргэний долоогоос нь халдвар илэрлээ.Гуравдугаар сарын 12-нд ирсэн нэг гэр бүлийн хоёр иргэний маршрут маш өргөн. Халдвар илэрсэн гэр бүлийн хоёр хүн Дархан хотод олон нийтийн газраар явахаас гадна гэр бүлийн хүрээнд Наурызын баяр тэмдэглэсэн. Тус гэр бүлийн хоёр хүний ойрын хавьтлын 139 хүн одоогийн байдлаар тогтоогдож байна. Ойрын хавьтлын ес нь Сэлэнгэ аймагт, 22 нь Дархан суманд, үлдсэн 108 нь Шарын гол сумын нутаг дэвсгэрт байна" гэлээ.

Эх сурвалж:www.polit.mn