Б.ДОЛЖИН

Харааны бэрхшээлтэй хүүхдийн 116 дугаар сургуулийн удирдлагууд удаа дараа солигдож байгаагаас хөгжлийн бэрхшээлтэй хүүхдүүдийн суралцах эрх зөрчигдөж буй талаар тус сургуулийн хөгжмийн багш Б.Батболд өнөөдөр мэдээлэл хийлээ.

 Тэрээр "Сүүлийн зургаан жилд есөн удаа 116 дугаар сургуулийн захирал солигдоход 87 хүн ажлаас чөлөөлөгдсөн. Одоогоор 79 хүнтэй ажиллаж байна. Энэ нь хүүхдүүдийн эрхийг зөрчиж байгаа асуудал. Хүүхдүүдтэй ажиллаж дасахад 3-5 жилийн хугацаа шаардлагатай байдаг. Манай сургуулийн захирлаар Ч хэмээх хүн томилогдсон. Ямар хүн захирлаар томилогдон ирэхээс хамаарч ажлын байрны тодорхойлолтыг  сольдог боллоо. Өмнө нь манай сургуулийн захирлын ажлын байрны тодорхойлолтод тусгай хэрэгцээт боловсролоор мэргэшсэн гэж тогтоосон байдаг бол өмнөх сайдын үед багш байж болно гэж өөрчилсөн. Боловсрол, шинжлэх ухааны сайд Л.Энх-Амгалантай уулзах хүсэлтээ илэрхийлсэн. Мөн Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатарт хандан, бичиг хүргүүлнэ” гэж ярилаа.

 Эх сурвалж:www.polit.mn