Б.ОД

Мэдээлэл технологийн салбарын асар хурдацтай хөгжлийн энэ үед дотоодын компаниуд хэрхэн олон улсад гарч хөрөнгө оруулалт татах вэ гэдэгт анхаарлаа хандуулсаар байна. Тиймээс олон улсын зах зээлд гарах боломжтой “And Global”, “Erxes”, “CallPro”, “World Plus”, “Shoppy” зэрэг компанийн удирдлагуудыг Ерөнхий сайд Л.Оюун-Эрдэнэ  өнөөдөр дахин хүлээн авч уулзлаа.

Мэдээлэл технологийн салбарыг шинэ шатанд гаргах нөөц боломжийн талаар гадаад, дотоодын хамтын ажиллагаа, дэд бүтэц, хууль эрх зүйн орчныг сайжруулахад төрөөс ач холбогдол өгч, дэмжлэг үзүүлэхийг хүссэн саналыг тавилаа.Мөн зарим орнуудад мэдээлэл технологийн салбарын компаниудад тодорхой дэмжлэг үзүүлдэг талаар Япон, Сингапурын жишээг татаж, татварын таатай орчин, хөнгөлөлттэй зээл, дэд бүтцийг хөгжүүлэхэд цогц дэмжлэг үзүүлж, хамтран ажилладаг баримтуудыг дурдаж байв.

Ерөнхий сайд Л.Оюун-Эрдэнэ  “Мэдээлэл, технологийн чиглэлээр амжилттай ажиллаж байгаа компаниудын төлөөлөлд аль болох өгөөжтэй байдлаас нь харж, дэмжин ажиллана. Энэ чиглэлийн тусгай санг байгуулах хэлбэрээр зохицуулалтууд хийнэ” гэв.

Эх сурвалж:www.polit.mn