С.САРУУЛ

Коронавирусын эсрэг вакцинжуулалтын явцын талаар ХӨСҮТ-ийн Дархлаажуулалтын албаны дарга О.Дашпагма мэдээлэл өглөө. Тэрээр “Нийслэлийн есөн дүүрэгт байгуулсан 35 цэгт 48 дархлаажуулалтын баг нийтдээ 420 гаруй эмч, мэргэжилтэн вакцинжуулалтын үйл ажиллагааг зохион байгууллаа. Гуравдугаар сарын 9-ний өдрийн байдлаар нийт 30446 хүнийг вакцинд хамруулсан бол зөвхөн өчигдөр 9470 хүнийг вакцинжууллаа. Вакцинд хамрагдсан хүмүүсийн, 47.1 хувь нь төрийн болон хувийн хэвшлийн эрүүл мэндийн байгууллагын эмч, ажилтнууд,  16.6 хувь нь хариу арга хэмжээний ажилд оролцож буй онцгой, цагдаа, мэргэжлийн хяналт, хил хамгаалах байгууллагын алба хаагчид эзэлж байна. 11.3 хувь нь үйл ажиллагааг нь тасралтгүй явуулах шаардлагатай ААН-үүдийн ажилчид, Үлдсэн нь дайчлагдан ажиллах хүмүүс болон худалдаа, үйлчилгээний газруудын ажилчдыг вакцинжуулаад байна.

Одоогоор вакцин хийлгэсний дараа ноцтой урвал, хүндрэл мэдээлэгдээгүй. Вакцин хийлгэсний дараа илрэх хариу урвалууд нь вакцины зааварт тусгагдсан хэмжээнд байна. Тодруулбал, вакцинд хамрагдсан нийт хүмүүсийн 60 хувьд нь халуурах шинж тэмдэг илэрнэ гэж вакцины зааварт мэдээлсэн. Мөн 40-50 хувьд нь хэсэг газар өвдөх, томуугийн шинж тэмдэг илэрнэ. Тэгвэл одоогоор вакцинд хамрагдаад буй хүмүүсийн 48.8 хувьд нь вакцины дараах хариу урвал илэрч байна" гэв.

Өнөөдөр нийслэлийн 46 байршилд 1200 орчим хүний бүрэлдэхүүнтэйгээр 94 баг ажиллана.

Вакцин хийлгэсний дараа иргэд хариу урвалын талаар мэдээлж, тохирсон хариу арга хэмжээг авах ёстойг анхаарууллаа.

Эх сурвалж: www.polit.mn