Ч.ОЛДОХ

ӨМӨЗО-ы нэгэн  гэр бүлийг  “Цахим анд” булангийн зочноор урилаа. Өрхийн тэргүүн Урагшилт  бизнесмэн, гэргий  Ялгуун нь бүжгийн багш юм.  “Бид Монголдоо олон удаа очсон. Буцаад явах гэхээр нэг л гунигтай байдаг юм” хэмээсэн тэд  өөрсдийн мэдэх чадах хэмжээнд монгол өв уламжлалаа дэлгэрүүлж  хөгжүүлэхийг хичээж яваа ажээ.

Урагшилт: МОНГОЛОО САЙХАН ХӨГЖӨӨСЭЙ ГЭЖ БОДДОГ

-Монгол Улсад олон удаа очсон. Буцаад явахад гуниг төрдөг гэлээ. Түүнээс гадна юу бодогддог вэ?

-Очих бүрт өндөр байшин нэмэгдэж,  Улаанбаатар хот өөрчлөгдсөн нь анзаарагддаг. Гэхдээ өндөр байшингаар хөгжлийг тодорхойлно гэвэл өрөөсгөл ойлголт юм. Монгол хүний хөгжлөөрөө тэргүүлэх ёстой. Тэгж байж дэлхийд гарна. Гуравхан  сая хүн амархан хөгжих ёстой. Гэхдээ монгол ахан дүүс маань жаахан амарч байгаа байх аа, дэлхийн талыг эзэлж байсан улс болохоор. Би найзууддаа тэгж хэлдэг, бас итгэж хүлээдэг  юм.

-Монголоос таны сэтгэлд юу тод үлдэв ?

-Байгалийн сайхан нь үнэхээр тансаг. Монгол нутаг минь бүсгүйчүүд шигээ үзэсгэлэнтэй шүү. Монголынхоо эмэгтэйчүүдэд Мартын 8-ны мэндийг хүргэе.

-Та хаана боловсрол эзэмшив, ямар салбарт ажиллаж байна?

-Би бага, дунд боловсролыг нутагтаа эзэмшсэн. Шилийн гол аймгийнхаа монгол сургуулиас өгсүүлээд алс холын Америкт очиж Миамигийн их сургуульд суралцсан. Төгсч  нутагтаа ирээд  гэр бүл зохиож, ажиллаж амьдарч байна.  Шилэн хотдоо  очиж хуримаа хийсэн. Дүн өвлөөр гадаа  -25 градусын хүйтэн байсан ч бид  зүрх сэтгэлийнхээ гүн дэх халуун сайхан мэдрэмжээр  гадаа  бүтэн долоон цаг байж зургаа  авахуулж байлаа.  Хамгийн дурсгалтай мөчүүдийн маань  нэг нь хуримын ёслол байлаа.

-Цаашид  хийж бүтээхээр   хүсч мөрөөддөг зүйлүүдийг чинь сонирхоё?

- Монголдоо очиж, мэдэж сурсан зүйлээрээ бага боловч тус нэмэр болохсон гэж боддог.

Харин гэргий Ялгуун нь “Би  Эрээн хотоос гаралтай. Хүүхэд байхаас  бүжиглэж сурсан. Одоо Эрээн хотдоо монгол бүжгийн дугуйлан ажиллуулдаг. Олон шавь нартай, тэдэндээ бүжгийн урлагийг зааж сургаж байна” хэмээн өөрийгөө танилцуулав. Тэрээр Бүжиг бол өв соёл, түүхийг хадгалж, хэдэн зуун өртөөлөн  харуулж байдаг урлаг юм. Би бүжгийн урлагаар дамжуулан  монгол өв уламжлалаа өвлүүлэхийг боддог” гэлээ.

Эх сурвалж: “Зууны мэдээ” сонин

2021.3.9 МЯГМАР № 45 (6522)