Б.ДОЛЖИНЖАВ

Нийслэлээс орон нутаг руу зорчих хөдөлгөөнийг өнөөдрөөс нээж байгаатай холбогдуулан ЗГОНХХ-ийн дарга Ц.Ганзоригоос зарим зүйлийг тодрууллаа.

-Орон нутаг руу зорчиж байгаа гэр бүлийн гишүүд бүгд шинжилгээ өгсөн байх шаардлагатай юу, эсвэл нэг гишүүн нь өгсөн байхад болох уу?

-Хамт яваа гэр бүлийн гишүүдийн аль нэг нь PCR шинжилгээ өгсөн тохиолдолд бусад гэр бүлийн гишүүдээс шинжилгээ шаардахгүй. Харин тухайн гэр бүлд хамааралгүй зорчигч хамт яваа бол тус тусдаа шинжилгээ өгнө. Галт тэргээр явах зорчигч бусад тээврийн хэрэгслээр зорчигчийн нэг адил PCR шинжилгээ өгч зорчино. Өнөөдрөөс орон нутгийн нислэг эхлэх бол  энэ сарын 3-наас нийтийн тээвэр орон нутагт явахад бэлэн болж байна.

- Иргэд очоод тусгаарлагдах уу?

-Тухайн орон нутгийн байнгын оршин суугч УБ-аас очсон тохиолдолд гэрээр  долоо хоног тусгаарлагдана. Мөн орон нутагт суурин ажилладаг хүн очсон үед мөн адил долоо хоног гэрээр тусгаарлагдана гэж журамд туссан. Учир нь нууц үеийн хугацааг тооцсон.

- PCR шинжилгээ өгсөн өдрөөс 72 цагийг тооцох уу? Хариу гарсан цагаас тоолох уу?

- Шинжилгээний хариу гарсан өдөр,цагаас 72 цаг гэдэг хугацааг тооцно. ДЭМБ-аас өгсөн зөвлөмжийн дагуу PCR шинжилгээний хариу 72 цагийн дотор хүчинтэй байх талаар чиглэл өгсөн. Өөрөөр хэлбэл, хүний биед COVID-19 вирус халдварласан бол 72 цагаас эхлэн тухайн хүний биед эмнэлзүйн шинж тэмдэг гарч шинжилгээнд илрэх боломжтой учраас 72 цаг гэж шаардаж байгаа юм. Иргэдтэй харилцаа үүсгэхгүй тул шинжилгээний хариу нь очсон газраа 72 цаг өнгөрсний дараа ч хүчинтэй байна.

Эх сурвалж:www.polit.mn