Б.ДОЛЖИНЖАВ
ЗГОНХХ-ийн дарга Ц.Ганзориг ЭМЯ-ны ээлжит хэвлэлийн хурлын үеэр сэтгүүлчдийн асуултад хариуллаа.
- "Нэг хаалга-Нэг шинжилгээ" үйл ажиллагаа хэдэн хувийн гүйцэтгэлтэй явж байгаа вэ?
- Шинжилгээ эхэлснээс хойших эхний долоо хоногийн хугацаанд 250 мянга орчим өрхөөс шинжилгээг аваад байна. Үлдэж байгаа хугацаанд 160 мянган өрхийг шинжилгээнд хамруулна. Төлөвлөсний дагуу шинжилгээгээ аваад энэ сарын 23-ны 06:00 цаг гэхэд нэгтгэсэн дүн гарч дуусна. Үүний дараа Засгийн газраас зарласан 10 их наядын цогц төлөвлөгөөг хэрэгжүүлэх эхний үе шат хэрэгжээд явах юм.
- Энэ сарын 23-наас бизнесийн байгууллагуудын үйл ажиллагааг нээхтэй холбогдуулан бизнес эрхлэгчид, ААН-үүдэд ямар шаардлага тавих вэ?
- Энэ сарын 22-ны өглөө вакцины эхний татан авалтын онгоц газардана. Ийн 23-наас дархлаажуулалт эхэлнэ.Эхний татан авалтаар 150 мянган хүн тун буюу нэг хүнд хоёр тунгаар тооцвол 75 мянган хүний вакцин ирж байгаа гэж ойлгож болно. Үүний дараа дараагийн вакцинууд шат дараатайгаар ирнэ. 75 мянган хүн тун вакцинаар эмч, эмнэлгийн ажилтнууд, цагдаа, онцгой байдлын алба хаагчдыг дархлаажуулна. Вакцинжуулалт эхлэхээс өмнө ААН-үүд үйл ажиллагаагаа шат дараатайгаар нээх орчныг бүрдүүлэхийн тулд нийтлэг түр журмыг боловсруулаад танилцуулсан. Жишээлбэл, үзвэрийн танхимд танхимын багтаамжаас хамаараад хүн хоорондын зайг баримтлан 30-50 хувийн дүүргэлттэй үйл ажиллагаа явуулж болохоор зааж байгаа. Фитнесс заал мөн үүнтэй адилхан. 13 төрлийн 57 үйл ажиллагаанаас хамаараад зайлшгүй шаардлагууд тавигдаж байгаа.
Эх сурвалж:www.polit.mn