Б.ДОЛЖИНЖАВ

Монгол Улсын Ерөнхийлөгч Х.Баттулга Монгол Улсаас Бүгд Найрамдах Өмнөд Судан Улс /БНӨСУ/ болон Исламын Бүгд Найрамдах Афганистан Улсад үүрэг гүйцэтгэж буй энхийг сахиулагчидтай өнөөдөр цахим уулзалт хийлээ.

 Энэ үеэр Монгол Улсын Зэвсэгт хүчний Жанжин штабын дарга, хошууч генерал Д.Ганзориг “Монгол Улсын Зэвсэгт хүчин 2002 оноос эхлэн Ирак, Афганистан, Гүрж, Косово, Чад, Баруун Сахар, Бүгд Найрамдах Өмнөд Судан Улс гэсэн 12 улс орон, бүс нутагт үүрэг гүйцэтгэж байна. Энэ оны хоёрдугаар сарын 1-ний байдлаар 19300 цэргийн алба хаагч үүрэг гүйцэтгээд байна. 2006 оноос хойш манай 700 гаруй эмэгтэй офицер, ахлагч НҮБ-ын энхийг сахиулах ажиллагаанд штабын офицер, цэргийн ажиглагч болон цэргийн багт үүрэг гүйцэтгэсэн.  Дэлхийн 126 улсаас эмэгтэй энхийг сахиулагчдын тоогоороо 17 дугаарт жагсаж байна. Энэ сарын 15-ны байдлаар долоон ажиллагаанд 1116 цэргийн алба хаагч үүрэг гүйцэтгэж байна” гэсэн юм.

 Харин Ерөнхийлөгч Х.Баттулга “Цар тахлын туйлын хэцүү, эрсдэлтэй нөхцөлд үүргээ амжилттай гүйцэтгэж байгаа цэргийн алба хаагчдадаа Зэвсэгт хүчний Ерөнхий командлагч болон Монголын ард түмний нэрийн өмнөөс талархал илэрхийлье. Цэргийн алба хаагчид Та бүхэн Монгол Улсын үндэсний аюулгүй байдал болон олон тулгуурт гадаад бодлогын салшгүй нэг хэсэг юм. Та бүхний үүргээ амжилттай биелүүлж байгаа өдөр бүрээр эх орны чинь аюулгүй байдал баталгаажиж байна” гэв.

Эх  сурвалж:www.polit.mn