С.САРУУЛ

“Аз”-ын гэх тодотголтой улсын дугааруудыг санамсаргүй байдлаар “унагаж” хүмүүст өгдөг байсан нь авлигын нэг шалтгаан болж байна гэж үзэж АТГ-аас “ажилласны” дагуу цахим дуудлага худалдаагаар зарахаар болсон.  Анхны дуудлага худалдаа өнөөдөр эхэлж иргэд auction.transdep.mn сайтад бүртгүүлж, 50 мянган төгрөгийн дэнчин төлснөөр дуудлага худалдаанд оролцох эрхтэй болж байгаа юм. Ингээд хамгийн өндөр үнэ хэлсэн иргэн мөнгөө төлж баталгаажуулснаар хос дугаарын эзэн болох зарчимтай.

Энэ дагуу автомашины “Аз”-ын дугаарын дуудлага худалдаа эхэлсэн мөчид 0001 УАP улсын дугаарын үнэ гэрлийн хурдаар өсч 427.450.000 төгрөгт хүрэв. Мөн өдөрт 20 дугаарыг дуудлага худалдаанд оруулах бөгөөд нэг дугаар 60 гаруй сая төгрөгөөр худалдаалагдсан гэдгийг АТҮТ-ийн мэргэжилтэн хэлж байна. Хэрэв хамгийн өндөр үнэ хэлсэн хүн заасан хугацаанд мөнгөө шилжүүлэхгүй бол хүчингүй болж, дахин дуудлага худалдаанд оруулах юм байна.

АТГ, Зам тээврийн хөгжлийн яамныхны ярилцсанаар дуудлага худалдаанаас олсон орлогыг тусгай санд төвлөрүүлж, хүүхдийн хөгжил болон хөгжлийн бэрхшээлтэй иргэдэд зориулсан үйл ажиллагаанд зарцуулах хэмээн мэдээлж буй. Хэдийгээр улсын төсөвт их хэмжээний мөнгө орж байгаа нь сайшаалтай ч автомашиндаа хагас тэрбумын төмөр зүүдэг монголчуудын хандлагыг шүүмжлэх иргэд ч олон байна. Мөн монголчуудын амьжиргааны түвшний ялгаа ч тод томруун харагдаж байгаа юм. Цар тахлын нөлөөгөөр эдийн засаг хямарч өдрийн хоолгүй хонох айлууд олон байгаа бол нөгөө талд хэдэн орон сууц, автомашин худалдаж авах мөнгөөр нэг хавтгай төмөр худалдаж авч байгаа юм.  

Эх сурвалж: www.polit.mn