С.САРУУЛ

Гамшгаас хамгаалах бүх нийтийн бэлэн байдлын зэрэгт шилжсэн ч зөвшөөрөгдсөн 14 байгууллагын ажилтнууд хувийн автомашинаар хөдөлгөөнд оролцуулахаар болсон. Гэвч цагдаагийн байгууллага зорчуулахгүй байна гэсэн шүүмжлэл гараад байгаа юм. Энэ талаар ЦЕГ-ын Хэвлэл мэдээллийн төвийн дарга, дэд хурандаа Б.Баатархүүгээс тодруулахад “Цагдаагийн байгууллага явган зорчигч болон тээврийн хэрэгслийн хөдөлгөөний хязгаарлалтыг төрийн байгууллагын албан хаагчидтай хамтран зохион байгуулж байна. Анх удаа хамтарч ажиллаж байгаа учраас алдаа дутагдал гарахыг үгүйсгэхгүй. Цагдаа болон иргэдийн хооронд үл ойлголцол гарсныг засч залруулж зохицуулалт хийж байгаа. Нөгөө талд хувийн машинаар зорчихыг зөвшөөрсөн зарим байгууллагын ажилчдын тоонд хязгаарлалт тавьсан. Жишээ нь, хэвлэл мэдээллийн байгууллагын нийт ажилчдын 10-15 хувийг хувийн унаагаар хөдөлгөөнд оролцохыг зөвшөөрсөн. 50 ажилтантай байгууллагын 5-6 л хувийн унаагаар хөдөлгөөнд оролцоно гэсэн үг. Тэдгээр байгууллага ажиллах хүмүүсийнхээ хуваарийг баталгаажуулж, нэг хувиа Шуурхай штаб руу хүргүүлэх ёстой. Тухайн ажилтан энэ хуваариа ажлын үнэмлэхтэйгээ биедээ авч явна. Ажлын газрын тодорхойлолт бус Гамшгаас хамгаалах бэлэн байдлын зэрэгт шилжсэн хугацаанд ажиллах хуваарь байх ёстой гэдгийг анхааруулъя. Энэ тохиолдолд замын хөдөлгөөнд оролцуулна” гэв.

Эх сурвалж: www.polit.mn