Б.ДОЛЖИНЖАВ
Мэдээллийн технологийн салбарынхан өнөөдөр Засгийн газрын гишүүдтэй уулзаж, салбарын асуудлаа ярилцлаа. Энэ үеэр саналаа хэлсэн “Erxes Inc”-ийн үүсгэн байгуулагч А.Мэнд-Оршихын байр суурийг хүргэж байна.
-Дэлхийн улс орон XXI зуунд амжилттай яваа гарааны компаниудынхаа тоог ярьж байна. Харин Монголд тийм зүйл байхгүй. Учир нь залууст мөрөөдөл алга. Google шиг биш юмаа гэхэд AirBnB, Uber шиг компани байгуулах мөрөөдөл байхгүй. Мөрөөдөлтэй байхад хамгийн их саад тотгор учруулж байгаа нь төр. Өнгөрсөн 20 гаруй жилийн хугацаанд төр олон хулгайч, тендер иддэг компанийг цэгцтэйгээр бэлдсэн. Өнөөдөр цугласан компаниудын тал нь бүтээгдэхүүнээ яаж Цахиурын хөндийд гаргах уу, олон улсад яаж улсынхаа нэрийг авч гарах вэ, залуустаа яаж мөрөөдөл авчрах вэ гэдэг зорилгын төлөө явж байна. Харин тал нь засаг дагаж баяждаг, эсвэл тэгж олсон мөнгөөрөө цэврээр өрсөлдөж байгаа компаниудын инженерүүдийг хулгайлдаг тогтолцоо үүсээд удаж байна. Үүний хамгийн том тоглогч нь засаг. Бидэнд тендер хэрэггүй. Тендер дагадаг компаниудыг болиулах хэрэгтэй. Насаараа тендер хийлээ. Хөгжсөн зүйл алга.
-Цахим үндэстэн болоод дотооддоо сайхан харагдана. Долоон буудал, аймаг, сумдад хэрэгтэй. Гэхдээ энэ нь том нөлөөлөл авчрах зүйл биш. Өнөөдөр бид мөрөөдөлтэй байж, Цахиурын хөндийд 2-3 компанийг тамгалсны дараагаар цахим шилжилт байгалийнхаа хуулиар бүрдэнэ. Шаардлагатай бол бэлэн технологиуд бий. Зовж бүтээх шаардлага байхгүй. Чадсан улсынх нь бэлэн туршлага, чадсан компанитай нь хамтраад ажиллаж болно. Харин чадахгүй байгаа зүйл нь олон улсад нэгдмэл байдлаар гарч чадахгүй байна.
-Монгол гэж очоод сүүлийн найман жилд Цахиурын хөндийд хөрөнгө оруулалт татах гээд зүтгэж байна. Америкт очиход Монгол хүн бол хэн ч биш. Энд бид гоё зүйл ярилаа ч олон улсад хэн ч биш. Цахим үндэстэн больё гэж мөрөөдөл ярих нь зорилт байж магадгүй. Харин олон улсад өрсөлдөх хүсэлтэй залуус бидэнд энэ нь сонирхолтой зүйл биш. Тиймээс бид энэ тендерт орохгүй. Өмнөх ажлаа хийж бусад улс оронд гарааны бизнес хэрхэн амжилттай явж байна, түүнийг судлахын төлөө ажиллана.
Эх сурвалж:www.polit.mn