Б.ДОЛЖИНЖАВ
“Тоёоко Инн” зочид буудалд тусгаарлагдаж байсан 31 иргэнээс халдвар илэрсэн гэж өчигдөр үдээс хойш мэдээлж иргэдийг ХӨСҮТ-рүү шилжүүлсэн.Тэгвэл өнөөдрийн 11:00 цагийн ЭМЯ-ны ээлжит хэвлэлийн хурлаар сүүлийн 24 цагт халдварын 18 тохиолдол илэрсэн гэж мэдээлсэн. Үүнтэй холбогдуулан ХӨСҮТ-ийн Тандалт,судалгааны албаны дарга А.Амбасэлмаа мэдээлэл өглөө.
Тэрээр "Хоёр зүйл дээр тайлбар мэдээлэл өгье. Арваннэгдүгээр сарын 11-нд дотоодын халдварын анхны тохиолдол бүртгэгдсэнээс хойш дөрвөн хүн нас барлаа. Энэ дөрвөн тохиолдлын хоёр нь COVID-19 халдвараар өвчлөөд эдгэрсний дараа архаг хууч өвчин /зүрх судасны дутагдал, зүрхний хэм алдалт/-ий улмаас нас барсан. Хоёр нь халдвартай гэж оношлогдоод эмчлэгдэж байхдаа нас барсан. Тухайн хоёр хүний хувьд мөн архаг хууч өвчтэй, өндөр настай хүмүүс байсан. Эхний нас баралт арванхоёрдугаар сарын 25-нд бүртгэгдсэн бол нэгдүгээр сарын 5, 12, 22-нд дараагийн нас баралтууд бүртгэгдсэн. “Тоёоко Инн” зочид буудалд сүүлийн долоо хоногт өвчилсөн хүмүүсийн ойрын хавьтал 300 орчим хүн тусгаарлагдаж байсан. Тусгаарлалтад байсан хүмүүсийн анхан болон давтан шинжилгээгээр халдвар илэрсэн. Ингээд халдвартай иргэдийг ХӨСҮТ-рүү шилжүүлсэн. Тусгаарлан ажиглах байранд хавьтлуудыг долоо хоног тусгаарлах хугацаанд хоёр удаагийн шинжилгээгээр халдвар илрээгүй бол гэрийн ажиглалтад шилжүүлэн долоо хоног ажиглаж байгаа. “Тоёоко Инн” зочид буудалд тусгаарлагдаж байсан 31 иргэнээс халдвар илэрсэн нь өчигдрийн 11:00 цагийн мэдээлэл дунд багтсан. Иргэдийг ХӨСҮТ-рүү шилжүүлэх ажил 11:00 цагийн мэдээллээс хойш зохион байгуулагдсан учраас буруу ойлголт үүссэн байна” гэж ярилаа.
Эх сурвалж:www.polit.mn