Б.ТУУЛ

Дэлхий дахинд COVID-19 цар тахал намжаагүй байна. Халдварын тархалт улс орнуудад эрчимтэй дэгдсээр хэдэн зуун сая хүн коронавирусын эсрэг вакцинд найдлага тавьсаар байна. Дэлхийн томоохон улс орнууд хүн ам, эдийн засгаа бүтэн авч үлдэхийн тулд COVID-19-ийн эсрэг вакцинжуулалтад иргэдээ яаралтай хамруулахыг чухалчилж байна. Хэдийгээр олон улсад хөл хорионы дэглэмийг хэрэгжүүлж, халдварын тархалтыг хумьж байгаа ч вирусын халдварын хоёр, гурав дахь давалгаа дэгдсээр байгаа юм. Их Британид анх илэрсэн коронавирусын шинэ хувилбараар халдварласан өвчлөлийн тохиолдол Ази, Европын орнуудад бүртгэгдсээр байгаа нь эмч мэргэжилтнүүдийн сэтгэлийг түгшээсээр байна. Тиймээс ДЭМБ-аас хүлээн зөвшөөрсөн вакцинжуулалтын ажил улс орнуудад хэрхэн өрнөж байгаа мэдээллийг тоймлон хүргэе.

СУРАГЧИД, ЭМНЭЛГИЙН АЖИЛТНУУДАА ВАКЦИНЖУУЛЖ БАЙНА

Ази, Европын улс орнуудад вакцинжуулалтын ажил идэвхтэй өрнөж байна. Тухайлбал, Францын Засгийн газар энэ оны наймдугаар сарын сүүлч гэхэд нийт хүн амаа вакцинжуулах боломжтой гэдгийг мэдэгдээд байна. Израил улс ЕБС-ийн хаврын элсэлтийн ерөнхий шалгалт эхлэх гэж байгааг тооцоолон 16-18 насныхныг COVID-19-ийн эсрэг вакцинжуулалтад хамруулж эхэллээ. Азийн орнуудаас Япон улсын иргэд коронавирусын шинжилгээнд идэвхтэй хамрагдаж байна. Шинжилгээний хариу эерэг гарсны дараа гэртээ өөрийгөө тусгаарлах хүний тоо нэмэгдэж байгааг тус улсын Эрүүл мэндийн яамнаас мэдэгдсэн. Харин БНСУ COVID-19-ийн эсрэг вакцинжуулалтаа ирэх сараас эхлүүлж, энэ оны есдүгээр сар гэхэд хүн амынхаа 70 хувийг үнэ төлбөргүй дархлаажуулахыг зорьж байна гэжээ. Тус улс эхний ээлжинд халдвар авах эрсдэл өндөр эмнэлэг, сувилал, асрамжийн газрын ажилтнуудыг вакцинд хамруулна. Дараагийн ээлжинд 65 болон түүнээс дээш насны хүмүүс, эмнэлгийн бусад байгууллагад ажилладаг хүмүүсээ дархлаажуулах бөгөөд архаг суурь өвчтэй болон 19-64 насны хүмүүсийг III улиралд вакцинжуулахаар төлөвлөөд байгаа ажээ.

Монголд COVID-19-ийн вакциныг төлбөргүй хийлгэх хүсэлтэй байна

Дэлхийн олон оронд вакцинжуулалтын ажил эхэлж буй энэ үед COVID-19-ийн эсрэг вакцин тариулахаас татгалзах нь зүйтэй гэсэн мэдээлэл тархсаар байна. Иймд зарим улсын хэвлэлд коронавирусын эсрэг вакциныг заавал хийлгэх 10 шалтгааныг дурдсан байна. Нөгөөтэйгүүр, саяхан АНУ-ын Калифорни мужид коронавирусын шинжилгээ өгч, халдвар илэрсэн нэг хүн нас барсныг сонин хэвлэлүүд мэдээлсэн. Энэ хэргийг тус улсын хууль сахиулах байгууллагын ажилтнууд шалгаж байгаа аж. Энэ мэдээлэл нь олон хүнийг вакцины аюулгүй байдал, үр нөлөөтэй эсэхэд эргэлзэхэд хүргэжээ. Харин манай улсад иргэд коронавирусын эсрэг вакцинд ямар сэтгэгдэлтэй байгааг ҮСХ-ноос судалсан байна. Энэ судалгаагаар таван хүн тутмын дөрөв нь вакциныг үнэ төлбөргүй хийлгэх хүсэлтэй байгаагаа илэрхийлжээ.

Судалгаанд оролцогчдын 80 хувь нь вакциныг төлбөргүй хийлгэх, 61 хувь нь төлбөртэй байсан ч хийлгэх хүсэлтэй байгаагаа илэрхийлсэн байна. Судалгаагаар коронавирусын халдвараас урьдчилан сэргийлэх арга хэмжээний талаарх хүн амын мэдлэг харьцангуй өндөр байгаа нь гарчээ. COVID-19-ийн эсрэг баталгаатай вакциныг хийлгэх хүсэлтээ илэрхийлсэн дүнг харвал хотын хүн амтай харьцуулахад хөдөө орон нутгийн хүн олон байна. Амьжиргааны түвшин доогуур өрхийн иргэдийн 86 хувь нь вакциныг үнэгүй хийлгэх хүсэлтэй байна. Судалгаанд хамрагдсан иргэд 25-30 мянган төгрөгөөр хийлгэнэ гэжээ. ҮСХ, Дэлхийн банктай хамтран хийсэн COVID-19-ийн нөлөөллийг тодорхойлох судалгааг Улаанбаатар хот болон зарим аймаг, сумын төвийг төлөөлүүлэн 1147 өрхийн мэдээлэлд үндэслэн гаргасан байна. Харин одоо манай улс хаанахын ямар вакцин оруулж ирэх гэж байгаа талаарх мэдээллийг сонирхьё.

МОНГОЛД “АСТРА ЗЕНЕКА” КОМПАНИЙН ВАКЦИНЫГ ОРУУЛЖ ИРНЭ

Сангийн сайдын үүрэг гүйцэтгэгч Ч.Хүрэлбаатар Энэтхэг улсаас вакцин оруулж ирэхээр бэлтгэлээ хийж байгааг өөрийн цахим хуудсаар мэдээлжээ. Тэрээр “Өнөөдөр Энэтхэг улс үндсэн хуулиа баталж, Бүгд найрамдах улсаа тунхагласан баярын өдөр. Бид газар зүйн хувьд хол оршдог ч түүх, соёлын хувьд ойр явж ирсэн хөрш орон юм. Энэ харилцаагаа ч өнөөдөр хадгалж үр бүтээлтэй хамтран ажиллаж байна. Коронавирусын  цар тахалтай энэ үед Ерөнхий сайд асан У.Хүрэлсүхийн Монголд вакцин нийлүүлэх хүсэлтийг албан ёсоор хүлээн авч тус улсын ерөнхий сайд Н.Моди богино хугацаанд нийлүүлэхээ илэрхийлж, тодорхой хэмжээний вакциныг үнэ төлбөргүй олгохоо мэдэгдсэн. Тиймээс Энэтхэгийн Серум институтээс “Астра Зенека” компанийн вакциныг оруулж ирэх бэлтгэл ажил ид явагдаж байна” хэмээн мэдээлэлдээ дурджээ.

Эх сурвалж: “Зууны мэдээ” сонин 2021.1.27 ЛХАГВА № 19 (6496)