Б.ДОЛЖИНЖАВ

Заримдаа нэг тийм хачин зүйлийг бид мэдэрдэг. Хичээгээд, зүтгээд, хөдөлмөрлөөд байгаа хэрнээ үр дүн гарахгүй байгаа мэт санагдаж, урам хугарахтай төстэй. Тэгвэл яг ийм эрч хүчээ алдсан, гунигласан, өөдрөг үзлээ гээсэн үедээ уншихад хамгийн сайн тохирох ном бол “Амжилтад хүрэх гал эрмэлзэл” юм. Зохиогч нь өндөр амжилтад хүрсэн хоёр ч компанийг үүсгэн байгуулсан, менежментийн ухаан, өвөрмөц арга барил, нийгмийн төлөөх хүчин зүтгэлээрээ дэлхий даяар хүлээн зөвшөөрөгдсөн Японы алдарт бизнесмен Инамори Казүо. Асар их эрч хүчийг бэлэглэж, шантралгүйгээр, тасралтгүйгээр зүтгэвэл заавал амжилтад хүрнэ гэдгийг баталсан энэ номны онцлох эшлэлүүдээс хүргэж байна.

-Алхам алхамаар зогсолтгүй урагшлах нь мөрөөдөлд хүрэх цорын ганц баталгаатай арга юм.

-Аугаа зүйл бүтээе гэвэл өдөр бүр зүдрэхийг үл хайхран зүтгэл гаргах хэрэгтэй. Шантралгүй үргэлжлүүлээд явбал хэзээ нэг цагт итгэхийн аргагүй өндөрлөгт хүрсэн байх болно.

-Хүчтэй эрмэлзэл, гал хүсэл тээн зогсолтгүй урагш тэмүүлвэл өнөөдөр биелшгүй зүйл маргааш биелэх болно.

-Хамгийн гайхалтай чадвар бол өөрийгөө ялах юм.

-Илүү өндөрт хүрч, оргилд гаръя гэвэл хатуу бэрхшээлтэй зориуд халз тулж, өөрийгөө байнга сорьж явах хэрэгтэй.

-Ажил хөдөлмөрт зөвхөн цалин авах гэдгээс илүү өөр юм бий. Ажлын үр дүн, зовж ард нь гарсан юм бүхэн хүнд сэтгэл дүүрэн байх ханамж өгдөг.

-Ажилдаа дурлаж, ажлаасаа баяр баясгалан олж хардаг хүн л амжилтад хүрнэ. Үнэхээр амжилтад хүрье, гайхамшигтай үр дүн гаргая гэвэл юуны түрүүнд ажилтай дуртай болоорой.

-Хүч хөдөлмөрөөр дамжуулан амьдралын шинэ утга учир, үнэ цэнийг олж мэдэрдэг.

-Бүх амьдралаа зориулах ажилтай байх эсэхээс хүний амьдралын аз жаргал хамаарна.

-Бүтэшгүй мэт  санагдах ажил байвч бүтээхийн төлөө сөхрөлгүй хичээе.

-Өдөр бүр илүү үр бүтээлтэй амьдарч чадвал ирээдүй тань нээлттэй байх болно.

-Хамгийн хэцүү үед ч өөдрөг үзэл, маргаашдаа тэмүүлэх хүч, тэнхээ гэдэг хайвал дотроос олддог билээ.

-Амьдралын урт аянд бэрхшээл, хүнд хэцүү шалгуурууд, горьдлого тасрах явдал хэдэн ч удаа тохиолдоно. Гэвч энэ нь бүх хүч чадлаа дайчлан үнэн сэтгэлээсээ хичээх үнэт боломжийг олгодог юм.

-Өчигдрөөс өнөөдрийг, өнөөдрөөс маргаашийг сайжруулж явах хэрэгтэй.

-Амжилтад хүрэхийн тулд мөрөөдөл өвөртөлж, түүндээ согтох нь чухал.

Эх сурвалж:www.polit.mn