Монголын сэтгүүлч­дийн нэгдсэн эвлэл түүхт 70 жилийн ойн өдрөө буюу энэ сарын 16-нд сэтгүүл зүйн салбарын оны шилдгийг тодруулах “Ган үзэг 2020” тэргүүн наадмын шилд­гүүдээ шалгаруулсан юм. 
“Шилдэг сонин”-ы төрөлд 30 жилийн түүхтэй үндэсний өдөр тутмын “Зууны мэдээ” сонин шалгарсан билээ. 
“Шилдэг сонин”-ы шагналыг МСНЭ-ийн Сонин, сэтгүүл хариуцсан дэд ерөнхийлөгч Б.Нямдорж, МСНЭ-ийн Телевиз хариуцсан дэд ерөнхийлөгч Ө.Отгонбаатар, МСНЭ-ийн Гадаад харилцаа, хамтын ажиллагаа хариуцсан дэд ерөнхийлөгч Х.Батхишиг нар өчигдөр редакци дээр ирж гардуулсан юм.  
Үндэсний өдөр тутмын “Зууны мэдээ” сонин 2020 онд цар тахлын улмаас тогтоосон хатуу хөл хорионы үед зөв менежмент хийж нэг ч дугаар алгасалгүй уншигч, захиалагчдаа хүндэтгэн гаргаж байсанд талархаж байгаагаа илэрхийллээ. 
Мөн нийгмийн хариуцлагынхаа хүрээнд “Иргэдээ өмөөрч бичнэ” уриан дор сар бүр нийгэмд тулгамдаж буй тодорхой нэг асуудалд анхаарлаа хандуулан ярилцлага, сурвалжлагууд бэлтгэхийн зэрэгцээ төр, засгийн бодлого шийдвэрийг хянах, шүүмжлэх сөрөг хүчний үүргийг гүйцэтгэн ажиллаж байгаа зэрэг үзүүлэлтийг үнэлсэн гэж байлаа.