Б.ОД

ХХААХҮ-ийн сайд З.Мэндсайхан Европын сэргээн босголт, хөгжлийн банкны Монгол дахь суурин төлөөлөгч Ханнес Такачтай өнөөдөр цахим уулзалт хийлээ. Уулзалтын эхэнд ХХААХҮ-ийн сайд З.Мэндсайхан хүнс, хөдөө аж ахуй, хөнгөн үйлдвэрийн салбарыг хөгжүүлэхэд Европын сэргээн босголт, хөгжлийн банк анхаарал хандуулж, хамтран ажилладагт талархал илэрхийлэв. Хоёр тал “Уур амьсгалын өөрчлөлтөд тэсвэртэй усан хангамж” төслийн талаар ярилцсан юм.

Монгол Улсын Засгийн газраас усалгаатай газар тариаланг 2025 он гэхэд 100  мянга га хүргэх зорилт тавьсан. Үүний дүнд услалтын систем шинээр барих, сэргээн засварлах хөрөнгө оруулалт хийснээр усалгаатай тариалангийн талбайн хэмжээ 2019 оны байдлаар 56 мянган га хүрээд байна.

Түүнчлэн Засгийн газрын 2019 оны 356 дугаар тогтоолын дагуу “Дархан арьс ширний цогцолбор төсөл”-ийн шаардлагатай бусад санхүүжилтийг  Европын сэргээн босголт, хөгжлийн банктай байгуулсан Санхүүжилтийн ерөнхий хэлэлцээрийн хүрээнд шийдвэрлэх боломжтой эсэх асуудлаар талууд санал солилцлоо. “Дархан арьс ширний цогцолбор төсөл”-ийн дэд бүтцийн бүтээн байгуулалтад дэмжлэг үзүүлснээр олон улсад өрсөлдөх чадвартай бүтээгдэхүүн үйлдвэрлэл хөгжиж, эдийн засгийг олон тулгууртай болгох, хот суурин газрын өрсөлдөх чадварын нэмэгдүүлэх зэрэг төсөл амжилттай хэрэгжих нөхцөл бүрдэх юм.

Эх сурвалж:www.polit.mn