Л.ХЭРЛЭН

Барилгын салбарт  гарсан томоохон ослын нэг болох “Рапид Архитектур Констракшн”-ий барьж байсан орон сууцны таван давхарын карказаас ажилчин Х унаж хүнд гэмтсэн хэргийн шүүх хурал өнөөдөр 14:00 цагт  Сүхбаатар дүүргийн Эрүүгийн хэргийн анхан шатны шүүхэд болох тов гарчээ.

Нэхэн сануулахад, тус хэрэг 2019 оны тавдугаар сарын 19-ний 17:00  цагт  Сүхбаатар дүүргийн XI хорооллын VII хорооны нутаг дэвсгэр Хангай хотхоны хойно баригдаж байсан таван давхар орон сууцны барилга дээр гарсан байсан. Уг барилга нь Нийслэлийн хот төлөвлөлт ерөнхий төлөвлөгөөний газар, Хотын ерөнхий архитекторын Ажлын албаны хариуцсан “Загвар гэр хорооллын хөгжил” төслийн 40 айлын орон сууц юм. Гүйцэтгэгч нь “Рапид Архитектур Констракшн” компани бөгөөд 2017 онд ашиглалт оруулах байсан ч 2019 онд  дуусаагүй, улмаар дээрх осол гарсан байдаг.

Осол гарсан цагаас Сүхбаатар дүүргийн Цагдаагийн II хэлтэс шалгаж эхэлсэн бөгөөд Цагдаагийн газар, Мэргэжлийн хяналтын байгууллагаас “Рапид Архитектур Констракшн” компанийг хөдөлмөрийн аюулгүй байдлыг хангаагүй, Хөдөлмөрийн хууль зөрчсөн гэсэн зөрчлүүдийг урьдчилан тогтоосон ч хэрэг мөрдөх шатанд   1.7 жил өнгөрчээ. Өнөөдөр анхан шатны шүүх хурал болох юм байна.

Эх сурвалж: www.polit.mn