Б.ДОЛЖИНЖАВ

Цар тахлын сөрөг нөлөөг даван туулахад эмэгтэйчүүд, охидод туслах төрийн бус байгууллагуудын шинэ санаа, санаачлагыг дэмжих “Эмэгтэйчүүдийн эдийн засгийн чадавхыг бэхжүүлэх” төслийн уралдааныг Жендэрийн үндэсний хороо, Канадын Засгийн газартай хамтран улс даяар зарласан. Уралдаанд нийслэлийн  найман дүүргийн 56, 17 аймгийн 39, нийт 95 төрийн бус байгууллага төслөө ирүүлснээс нийслэлд долоо, Баян-Өлгий, Өвөрхангай, Сүхбаатар аймагт тус бүр нэг төсөл хэрэгжих юм. Цар тахлын үед эмэгтэйчүүд, охидод тулгамдсан бэрхшээлийг шийдэхэд хувь нэмэр оруулах эдгээр төсөл тус бүр найман сая төгрөгийн тэтгэлгээр дөрвөн сарын хугацаанд хэрэгжих юм.

Т.Энхбаяр: Эмэгтэйчүүд, охидод тулгамдаж буй асуудлаа даван туулахад нь тусална

Энэ талаар  Жендэрийн үндэсний хорооны Нарийн бичгийн дарга бөгөөд Ажлын албаны дарга Т.Энхбаяр “Төсөлд шалгарсан төрийн бус байгууллагууд эмэгтэйчүүд, охидод тулгамдаж буй асуудлыг илрүүлж, даван туулахад туслах, дэмжих ажлыг  цар тахлын үед оновчтой хэлбэрээр зохион байгуулна.Тухайлбал, Баян-Өлгий аймгийн  жижиглэнгийн бараа үйлчилгээ, үйлдвэрлэл эрхэлдэг  400 орчим эмэгтэй   хил боомт хаагдсантай холбоотой орлого нь буурч,  хөдөлмөр эрхлэлтэд нь  саад бэрхшээл үүсээд байгаа учир “Мянганы дэвшил” ТББ   эмэгтэйчүүдийн  хөдөлмөр эрхлэлтийг дэмжих чиглэлээр   дөрөв орчим сарын ажлын төлөвлөгөө  боловсруулсан. Энэ төслийн үр шим хүртэгчид нь Баян-Өлгий аймгийн охид, эмэгтэйчүүд , тэдний гэр бүл байх юм. Өвөрхангай аймагт  төрийн бус байгууллага 100 орчим эмэгтэйчүүдийг  хүүхдээ харж байгаа,  ковидоос үйлдэлтэй ажилгүй болсон гэж ангилан  цаашид хоршоолсон байдлаар хөдөлмөр эрхлэлтийг дэмжих ажлыг зохион байгуулна. Мөн   хөдөлмөр эрхлэхгүй байгаа хөгжлийн бэрхшээлтэй иргэдийг оролцуулах,   стресст нэрвэгдэх, биеийн байдал доройтохоос сэргийлэх чиглэлээр  гэртээ цэцэг, эмчилгээний төрлийн  ургамал  тарьж,   энэ хүндхэн цаг үеийг даван туулахад туслалцаа үзүүлэх  “Цэцэг бүр анхилуун” төсөл дэмжигдсэн. Энэ төслийн хүрээнд хөгжлийн бэрхшээлтэй охид нэг бүлэг болж бизнесийн сүлжээ үүсгэх, өөрсдийн цахим хуудсаар дамжуулан тасалгаанд ургадаг эмийн чанартай ургамлуудыг тарих арга барил болон цахим худалдааг хэрхэн эрхлэх талаар хамтдаа суралцаж хөгжихөд чиглэхээрээ онцлогтой” гэж ярилаа.

Эх сурвалж:www.polit.mn