Б.ДОЛЖИНЖАВ

Монгол хэл, бичгийн багш нарт зориулсан  “Оюун билгийн соёрхол” цахим лекц семинарын хоёр дахь өдрийн сургалт өчигдөр боллоо. Энэ сургалт нь   “Монгол бичгийн үндэсний хөтөлбөр III”-ийг хэрэгжүүлэхэд багш нарт онол, арга зүйн дэмжлэг үзүүлэх, мэргэжлийн мэдлэг, ур чадварыг дээшлүүлэх зорилготой юм.  Цахим сургалтыг Боловсрол, шинжлэх ухааны яам, Нийслэлийн боловсролын газар, Монгол хэл бичгийн багш, судлаачдын үндэсний холбоо хамтран зохион байгуулав. Нийслэлийн есөн дүүргийн ерөнхий боловсролын сургууль, насан туршийн боловсролын төв, мэргэжлийн сургалт, үйлдвэрлэлийн төв, коллежид ажиллаж буй монгол хэл бичиг, уран зохиолын 1000 орчим багш оролцсон юм.

Хоёр дахь өдрийн сургалтад МУИС-ийн профессор Н.Нансалмаа “Хэлд орох, хэл эзэших үйл”, СУИС-ийн профессор Ж.Баянсан “Хэлний соёл, үндэсний сэтгэлгээ”, Монгол Улсын Ардын багш Ш.Чоймаа “Үндэсний бичгийн заах аргын уламжлал, шинэчлэл”, МУИС-ийн багш, доктор В.Дашдаваа “Хэл сургахуй ба орчин цагийн хэл шинжлэл”, ШУА-ийн Хэл зохиолын Хүрээлэнгийн тасгийн эрхлэгч, доктор Э.Пүрэвжав “Монголын нууц товчоо, түүнийг заах сургах арга зүй” гэсэн  сэдвээр хичээл орлоо.

Эх сурвалж:www.polit.mn