С.САРУУЛ

2020 оны 12 сарын 26-ны 11:00 цаг

Коронавирусын халдварын нөхцөл байдлын талаар Эрүүл мэндийн яамнаас мэдээлэл өглөө. ХӨСҮТ-ийн Тандалт, судалгааны албаны дарга А.Амбасэлмаа “Сүүлийн 24 цагт улсын хэмжээнд 14227 хүнд шинжилгээ хийхэд долоон хүнд коронавирус илэрлээ. Долоон тохиолдлын дөрөв нь БЗД-ийн нэгдсэн эмнэлгийн голомттой холбоотой бөгөөд хоёр өвчтөн, нэг сахиур, гэр бүлийн хавьтал нэг байна. Тус дүүргийн эмнэлгээс эхтэй голомтод нийтдээ 146 хүн өвчиллөө. Үүнээс эрүүл мэндийн ажилтан 15, гэр бүлийн гишүүд 27, өвчтөн 81, сахиур 22, хавьтал нэг байгаа юм. Үлдсэн гурван тохиолдлын хоёр нь ХСҮТ-ийн ажилтан болон тэдний ойрын хавьтал нэг хүнээс халдвар илэрлээ. Эмч, ажилчид халдварын эрсдэлтэй хүнтэй ажиллаж байсан учраас халдвар авсан гэсэн урьдчилсан мэдээлэл байна. ХСҮТ-д тандалт судалгааг явуулж, ойрын хавьтал 112 хавьтлыг тусгаарласан. Мөн дам хавьтал 500 гаруй хүнийг илрүүлж, шинжилгээнд хамруулж байгаа. Урьдчилсан байдлаар 400 хүний шинжилгээнд коронавирус илрээгүй”гэв.

Улсын хэмжээнд халдварын батлагдсан тохиолдлын тоо 1082 байгаагаас  711 нь эдгэрсэн. Өвчтөнүүдийн биеийн байдлыг үнэлбэл, маш хүнд 3, хүнд 6, хүндэвтэр 53, хөнгөн 300 байна.

Эх сурвалж: www.polit.mn