С.САРУУЛ

Баянзүрх дүүргийн нэгдсэн эмнэлэгт хэвтэн эмчлүүлж байсан иргэнээс өчигдөр орой /2020.12.16/ коронавирусын халдвар илэрч тус эмнэлгийг бүрэн хамгаалалтад авсан юм. Энэ талаар ХӨСҮТ-ийн Тандалт, судалгааны албаны дарга А.Амбасэлмаа “Шинээр халдвар илэрсэн хоёр хүн нь БЗД-ийн нэгдсэн эмнэлэгт хэвтэн эмчлүүлж байсан иргэд юм. Тухайн иргэдийг эмнэлэгт хэвтэх үед түргэвчилсэн тестээр оношлоход хариу сөрөг гарч байсан бол хэвтсэнээс хойш 4-5 хоногийн дараа халдвартай нь батлагдлаа.Халдварын нууц үедээ эмнэлэгт хэвтсэн гэсэн үг. Халдварыг цааш тараахгүйн тулд яаралтай арга хэмжээ авч 200 гаруй хүнийг гэр гэрт нь тусгаарлан ажиллаж байна” гэв.

Тэгвэл эмнэлэгт хэвтэн эмчлүүлж байсан хүмүүсээс халдвар илэрсэнтэй холбогдуулан тусламж үйлчилгээг Нийслэлийн эрүүл мэндийн газар, ЭМЯ-наас зохицуулжээ.  Ингэхдээ амбулаторийн тусламж үйлчилгээ, жирэмсний хяналт, үзлэг оношилгоо, Баянзүрх дүүргийн Эрүүл мэндийн төв, эрүүл мэндийн төвүүдээр хэвийн явагдана. Харин зөвхөн хэвтүүлэн эмчлүүлэх тусламж үйлчилгээг зохицуулсан байна. Баянзүрх дүүргийн иргэд Баянзүрх дүүргийн 100 ортой эмнэлэгт үзүүлнэ. Насанд хүрэгчдийн 80 ор, хүүхдийн 20 ор бэлэн бий. Хэрэв тоо нь ихэсвэл Энэрэл эмнэлэг болон АШУҮИС-ийн эмнэлгүүдэд хэвтэн эмчлүүлэх үйл ажиллагааг зохион байгуулахаар төлөвлөсөн байна. Гемодиализын тусламж үйлчилгээ авдаг найман иргэн Сүхбаатар дүүргийн нэгдсэн эмнэлгээр үйлчлүүлнэ. Мөн БЗД-ийн иргэд яаралтай тусламж шаардлагатай, түргэн тусламжийн үйлчилгээ авах бол Сүхбаатар дүүргийн нэгдсэн эмнэлэгт хандах юм байна.

Эх сурвалж: www.polit.mn