С.САРУУЛ

2020 оны 12 сарын 17-ны 11:00 цаг

Эрүүл мэндийн яамнаас коронавирусын цар тахлын нөхцөл байдлын ээлжит мэдээллээ өглөө. 2020 оны арванхоёрдугаар сарын 16-ны өдөр улсын хэмжээнд 10 лабораторид 10599 хүнд шинжилгээ хийхэд таван хүнээс халдвар илэрчээ. Энэ талаар ХӨСҮТ-ийн Тандалт, судалгааны албаны дарга А.Амбасэлмаа “Таван тохиолдол бүгд Улаанбаатар хотод бүртгэгдсэн бөгөөд гурав нь батлагдсан тохиолдлын ойрын хавьтал. Харин хоёр хүн нь БЗД-ийн нэгдсэн эмнэлэгт хэвтэн эмчлүүлж байсан иргэд юм. Тухайн иргэдийг эмнэлэгт хэвтэх үед түргэвчилсэн тестээр оношлоход хариу сөрөг гарч байсан бол хэвтсэнээс хойш 4-5 хоногийн дараа халдвартай нь батлагдлаа” гэв.

Өнгөрсөн 24 цагийн хугацаанд Сэлэнгэ, Дархан-Уул, Говьсүмбэр, Архангай, Орхон, Дорноговь аймагт нэмж халдвар бүртгэгдээгүй бөгөөд улсын хэмжээнд дотоодын халдвар 470, нийт тохиолдол 923 болсон. Үүнээс өнөөдрийн байдлаар 384 хүн эдгэрсэн бол 530 батлагдсан тохиолдол эмчлэгдэж байна. Эмчилгээнд байгаа хүмүүсийн биеийн байдлыг үнэлбэл, хөнгөн-481, хүндэвтэр-45, хүнд-3, маш хүнд нэг хүн байна.

Эх сурвалж: www.polit.mn