Ц.МЯГМАРБАЯР

Цар тахалтай холбоотойгоор Засгийн газраас ипотек болон хэрэглээний зээлийн эргэн төлөлтийг хойшлуулаад байгаа билээ. Шийдвэрийн хэрэгжилтийн  явц ямар байгаа  талаар  Монголбанкны Мөнгөний бодлогын газрын Макро зохистой бодлогын хэлтсийн захирал Б.Анандаас тодруулав.

-Зээлийн эргэн төлөлтөө хойшлуулахаар хэчнээн иргэн хүсэлтээ гаргаж үүнд хамрагдаад байна вэ?

-Мөнгөний бодлогын хорооны арваннэгдүгээр сарын 23 нд хуралдсан ээлжит бус хурлаар зээлийн эргэн төлөлт нь доголдсон хэрэглээний зээлийн хугацааг сунгах шийдвэрийг дахин үргэлжлүүлж, долдугаар сарын 1-ний өдрийг хүртэл мөрдүүлэхээр болсон. 2020 оны арваннэгдүгээр сарын 23-ны Монголбанкны хурлын шийдвэрээс хойш 10.125 зээлдэгчийн 97.3 тэрбум төгрөгийн хэрэглээний зээлийн нөхцөлд өөрчлөлт оруулсан байна.

-Зээлийг төрлөөр нь ангилж тодруулна уу?

-Банкууд 2020 оны арванхоёрдугаар сарын 4-ний байдлаар нийт 98.504 зээлдэгчийн 879.6 тэрбум төгрөгийн хэрэглээний зээлийн нөхцөлд өөрчлөлт оруулсан. Энэ нь нийт хэрэглээний зээлийн багцын 20.4 хувийг бүрдүүлж байна. Нөхцөл өөрчилсөн зээлдэгчдийн тоо сүүлийн долоо хоногуудад эрс нэмэгдэж арванхоёрдугаар сарын 4-ний тайлант долоо хоногт 6.675 зээлдэгчийн 66.3 тэрбум төгрөгийн хэрэглээний зээлийн нөхцөлд өөрчлөлт оруулсан нь өнгөрсөн долоо хоногтой харьцуулахад 93.5 хувиар өссөн байна.

-Хэзээнээс эхлэн зээл нь доголдсон зээлдэгч энэ шийдвэрт хамрагдах вэ?

-Хэрэгжих хугацааг дээр хэлсэнчлэн 2021 оны долдугаар сарын 1 ний өдрийг хүртэл гэж заасан учраас энэ хугацаанд цар тахлаас шалтгаалан эргэн төлөлт нь доголдсон зээлийн хүсэлтийг банкууд хүлээж авах юм. Энэ шийдвэр нь зээлийн үлдэгдэл хугацаа нь 30 сараас их байгаа, эсвэл хугацаа сунгахад 30 сараас хэтрэхээр байгаа зээлдэгчдэд үйлчлэх юм. Харин 30 сараас доош буюу зохистой түвшинд байгаа зээлдэгчид угаасаа банкиндаа хандаад хугацаагаа сунгаад явах боломжтой.

- Хэрэглээний зээлийн хугацааг сунгахад хүү хуримтлуулах уу?

-Хэрэглээний зээлийн эх үүсвэр нь банкнаас гарч байгаа учир хүүг хуримтлуулна.

Эх сурвалж: “Зууны мэдээ” сонин