Д.АРИУН

ОХУ-ын Гадаад хэргийн сайд Сергей Лавров АНУ-ын NBC телевизэд ярилцлага өгөхдөө Аляскад ирэхдээ өмссөн “СССР” бичигтэй цамц нь улс төрийн утга агуулаагүй, харин залуу насныхаа дурсамжийг илэрхийлсэн зүйл хэмээн тайлбарласан байна.

Сэтгүүлчийн асуултад хариулахдаа тэрээр Ерөнхийлөгч Владимир Путины хэлсэн үгийг дурджээ. “ЗХУ задран унасанд харамсдаггүй хүн зүрхгүй, харин түүнийг сэргээхийг хүсдэг хүн толгойгүй” гэж В.Путины хэлсэн үгийг тэрээр  “туйлын үнэн” хэмээн үздэг гэсэн байна. Тэгээд хүний залуу нас, анхны хайр, найз нөхдөө дурсахгүй байх нь “хүний мөн чанарыг үгүйсгэхтэй адил” гэжээ.

С.Лавров хэлэхдээ “СССР” гэсэн бичиг нь Зөвлөлт Холбоот Улсыг сэргээхийг хүссэн дохио биш, харин  хувийн дурсамжийн илэрхийлэл  гэж тодотгожээ.

Аляскад болсон ОХУ, АНУ-ын дээд хэмжээний уулзалтад ирэхдээ Оросын Гадаад хэргийн сайд “СССР” гэсэн бичигтэй цамц өмссөн нь уулзалтын өмнө сэтгүүлчдийн анхаарлыг татсан. С.Лавровын өмссөн цамц нь Оросын  Челябинск хотод байдаг үйлдвэрийн бүтээгдэхүүн байсан. Тус үйлдвэрийн дарга хэвлэлд ярилцлага өгөхдөө, Сайдыг ингэж дээд хэмжээний уулзалтад өмсөж гарч ирнэ гэж бодоогүй хэмээн хэлсэн байдаг.

Сергей Лавров өмсч гарч ирсэн нь Челябинскийн үйлдвэрийн тухайд нэг ёсны сурталчилгаа болж, уулзалтын дараа ижил загварын цамц хурдан зарагдаж дууссан талаар оросын хэвлэлүүд мэдээлжээ. Дашрамд дурдахад СССР гэсэн бичигтэй цамц 10990 рублийн үнэтэй байсан аж.

Эх сурвалж: polit.mn