Оросын атомын мөс зүсэгч флотын түүхэнд шинэ хуудас нээгдлээ. Марина Старовойтова "Ямал" хөлгийн ахмадаар томилогдож, энэ албыг хашиж буй анхны эмэгтэй болж байгааг оросын хэвлэлүүд мэдээллээ.
Марина Старовойтоваг атомын мөс зүсэгт хөлгийн ахмадаар томилох шийдвэрийг Оросын атомын салбарын 80 жилийн ойд зориулсан ёслолын үеэр, наймдугаар сарын 20-нд Нижний Новгород хотод албан ёсоор зарласан байна.
Энэ үйл явдал зөвхөн нэг хүний мэргэжлийн амжилт биш, харин салбарын хүйсийн тэнцвэрт байдалд чухал алхам боллоо гэж ажиглагчид үзэж байна. Учир нь атомын мөсөн зүсэгч флот бол зөвхөн тээвэр, навигацийн хэрэгсэл биш, харин улсын эдийн засаг, геополитикийн стратегид чухал нөлөөтэй юм.
Маринагийн мэргэжлийн замнал атомын мөс зүсэгч "Зөвлөлт Холбоот Улс" хөлөг дээр ээлжийн ажилтнаар эхэлсэн. Тэрээр дараа нь худалдааны хөлгүүдэд ажиллаж, мэргэжлээ дээшлүүлснээр ахлах штурманы дипломтойгоор "Атомфлот"-д эргэн ирсэн байна. Сүүлийн жилүүдэд тэрээр атомын мөс зүсэгч "Ямал" хөлөг дээр туслахаар ажиллаж байжээ.
Эх сурвалж: polit.mn