С.САРУУЛ

 Улсын онцгой комиссоос /2020.12.03/ иргэд, аж ахуй нэгжүүд COVID-19 халдвараас урьдчилан сэргийлэх нэгдсэн цахим платформыг хийснээ танилцуулав. Засгийн газар, Улсын онцгой комиссоос зөвшөөрөл өгч, үйл ажиллагааг нь нээсэн 18 салбар qr.119.mn сайтад бүртгэлд хамрагдаж, тухайн аж ахуй нэгжийн үйл ажиллагааны төрөл, холбогдох утас, байршил зэргийг бүртгүүлж QR код үүсгэн, код бүхий наалтыг үүдэндээ байршуулах юм. Харин иргэдийн хувьд тухайн аж ахуй нэгж, байгууллагаар үйлчлүүлэхдээ үүдэнд нь QR кодод заавал уншуулна. Ингэснээр халдварын эрсдэлд орлоо гэхэд хэдхэн секунтын дотор мэдээлэл нь И-баримт апплейкшнд ирэх юм. Энэ талаар Харилцаа холбоо, мэдээллийн технологийн газрын дарга Б.Болор-Эрдэнэ “Олон улсын туршлагыг судлахад GPS, Bluetooth технологийг ашиглаж тандалтын судалгааг хийдэг. GPS, Bluetooth гардаг эрсдэл нь хувь хүний мэдээллийг алдах магадлал бий учир QR-ыг сонгосон. QR систем иргэний хувийн мэдээллийг алдахгүй байх ач холбогдолтой. QR системийг 1.7 сая хэрэглэгчтэй и-баримт апп-ыг ашиглаж оруулж байгаа. QR.119.mn гэсэн сайт руу нэвтэрч газрын зураг дээр тухайн байгууллагын байршил, утасны дугаар зэрэг холбогдох мэдээллээ оруулаад хэдхэн секундэд байгууллагынхаа QR кодоо үүсгэх боломжтой. Энэхүү QR кодоо ААН-үүд үүдэн хэсэгтээ байршуулна. Иргэд тухайн байгууллагаар үйлчлүүлэхдээ  и-баримт системээ ашиглан QR кодыг уншуулна. Тухай байгууллагад халдвар гарлаа гэхэд үйлчлүүлсэн иргэдийн гар утсанд нь маш богино хугацаанд мэдээлэл нь  очно” гэв.

Иргэд И-баримт системийг утсандаа суулгаж дээд буланд байрлах Ковид-19 гэсэн цэсний QR код уншуулах хэсэг рүү орж албан байгууллагын үүдэнд наасан кодыг уншуулах юм.

Эх сурвалж: www.polit.mn