Ч.ЗОТОЛ

Хан-Уул дүүргийн Нийгмийн даатгалын хэлтэс иргэдээс ирүүлсэн асуултад онлайнаар  хариу өглөө. Асуулт, хариултыг багцлан хүргэе.

-Жирэмсний амралт, хөдөлмөрийн чадвар түр алдсаны материалыг хэрхэн  шийдэх вэ?

Жирэмсний амралт, хөдөлмөрийн чадвар түр алдсаны материалыг  хуулийн хугацаа нь  дөрвөн долоо хоногийн дотор авдаг. Хүндэтгэх шалтгаантай бол зургаан сарын дотор авдаг. Бүх нийтийн өндөржүүлсэн бэлэн байдал, хөл хорионы  дэглэмтэй байгаа үед бичиг, баримтаа хоцроох вий гэж сандрах хэрэггүй. Хөл хорио  тавигдсаны дараа  манай хэлтэс хандаж материалаа өгч  болно. Нөхөн олгоно.

-Өндөр насны болон тэжээгчээ алдсаны тэтгэвэр, группийн  бичиг, баримтыг яах вэ?

-Эдгээр бичиг баримтыг  хүндэтгэх шалтгаантай бол гурван сарын дотор бүрдүүлж авах хуулийн зохицуулалттай. Нийтийг хамарсан хөл хорио нь хүндэтгэх шалтгаан учраас иргэд  сандралгүйгээр  хөл хорионы дараа ирээд материалаа өгч болно.

-Сайн дурын даатгалын  энэ сарын шимтгэлийг  онлайнаар төлөх үү?

-Онлайнаар төлөх боломжтой. Манай хэлтсийн цахим хуудаст бүх банкны мэдээлэл бий.

-Өнгөрсөн сарын нийгмийн даатгалын шимтгэлээ  төлөөгүй байсан юм. Энэ сард тайлангаа яаж гаргах вэ?

-Цар тахалтай холбоотойгоор төлөх  хугацааг хойшлуулсан. Иймд ямар нэгэн торгууль, алданги тооцогдохгүй төлөгдөж байгаа.

-Нийгмийн даатгал төлсөн тайлангаа яаж өгөх вэ?

-Манай орлого, шитмтгэлийн бүх байцаагч онлайнаар ажиллаж байгаа. Иймд тайлангаа онлайнаар илгээгээд, дараа нь цаасаар өгч болно.

-2020 оны нийгмийн даатгалаа  нөхөж төлөх гэсэн юм. Ямар зохицуулалт байгаа вэ?

-Малчин, хувиараа хөдөлмөр эрхлэгч иргэний тэтгэврийн даатгалын нөхөн төлөлтийг асууж байна гэж ойлголоо. Энэ хууль нь 2017 онд батлагдсан. 2020 оны нэгдүгээр сарын 1-нээс хэрэгжээд явж  байгаа нэг жилийн хугацаатай хууль юм. Хэрэв малчнаар  ажиллаж байсан бол малчны А дансны архивын лавалгаа, хэрэв хувиараа хөдөлмөр эрхэлж байсан бол хүн амын орлогын албан татвар төлсөн баримт  бичиг, татварын байгууллагаас тодорхойлолт авчраад хамрагдаж болно. Төлөх хэмжээ нь сарын 42 мянган төгрөг байгаа.

Эх сурвалж: www.polit.mn