С.САРУУЛ

Улсын онцгой комисс урд шөнө яаралтай хурал зарлаж,  нийслэлээс орох, гарах хөдөлгөөнийг хязгаарлаж, гурав хоногийн хугацаанд сургууль, цэцэрлэгийг хаах шийдвэр гаргасан байна.

Олон улсын тээврийн жолооч 21 хоног тусгаарлалтад байж байгаад гэртээ гарсан бөгөөд өөрөөс нь болон гэр бүлийн хүнээс нь коронавирусын халдвар илэрсэн нь батлагджээ. Тиймээс хариу арга хэмжээ авах төвөлөгөөний дагуу нийслэлд хөл хорио тогтоох шийдвэр гаргаж, ойрын хавьтлыг судалж, тандалт судалгаа хийж эхэлжээ.

Тодруулбал, орон нутгийн хуваарьт нислэг, суудлын галт тэрэгний хөдөлгөөнийг 2020 оны арваннэгдүгээр сарын 11-ны өдрийн 02.00 цагаас арваннэгдүгээр сарын 13-ны өдрийн 23.00 цаг хүртэл, Нийслэлийн бүх шатны боловсролын байгууллага, сургалтын төвийн үйл ажиллагааг мөн 3 хоног түр зогсоохоор болжээ.

Мөн нийтийн тээвэрт өглөө, орой ажлын цагаар тодорхой зохицуулалт хийхээр болсон байна. Тодруулбал,  өглөө 06.00-10.00 цаг, 17.00-21.00 цагийн хооронд буюу ажил ирэх, тарах үед иргэдэд үйлчилнэ.

Эх сурвалж: www.polit.mn