С.САРУУЛ

Коронавирусын халдвар авсан байж болзошгүй нэг тохиолдол Баян-Өлгий аймагт өчигдөр бүртгэгдсэн байна. Түргэвчилсэн оношлуураар шалгахад эерэг гарсан бөгөөд PCR шинжилгээний хариу өнөөдөр /2020.11.03/ гарна. Тус аймагт коронавирусын сэжигтэй тохиодол бүртгэгдсэн учир УОК-ын даргын захирамжаар байгуулагдсан ажлын хэсэг ажиллаж эхэлсэн байна. Энэ талаар Эрүүл мэндийн яамнаас тодруулахад “Хил залгаа хөрш улс орнуудад коронавируст халдварын тохиолдол улам эрчтэй нэмэгдэж байгаатай холбогдуулан Улсын Онцгой комиссоос хамтарсан ажлын хэсэг Баян-Өлгий аймагт ирж, халдвараас урьдчилан сэргийлэх, бэлэн байдлыг хангах, Мэргэжлийн арга зүйн зөвлөгөө өгөх, ард иргэдийн дунд тандалт судалгаа хийх зорилгоор ажиллаж байна.  Энэ хүрээнд өчигдөрөөс эхлэн импортоор бараа таваар оруулдаг аж ахуйн нэгжүүдийн ажилтнууд болон өвчний голомт бүсээс ирж тусгаарлагдаж гарсан иргэдээс сорьцын шинжилгээ авч тандалт судалгаа хийж байна. Шинжилгээний хариугаар батлагдсан тохиолдол илрээгүй” гэлээ. Мөн эх сурвалжийн мэдээлж буйгаар Баян-Өлгий аймаг дахь коронавирусын халдварын сэжигтэй тохиолдлын PCR шинжилгээний хариу сөрөг гарсан гэв.

Эх сурвалж: www.polit.mn