Т. Батцэцэг

“Polit”  хуанли:  “Төрсөн өдөр” буландаа зургаадугаар сарын 8-нд төрсөн өдөр нь тохиож буй эрхмүүдийн нэг болох Ховд аймгийн Зэрэг сумын харьяат, үндэсний бөхийн улсын заан цолтой Баярхүүгийн Бат-Өлзийг онцолж байна. Тэрээр 1992 оны энэ өдөр төржээ.  Б.Бат-Өлзий заан нь Ардын хувьсгалын 100, 101 жилийн ойн түүхт баяр наадмаар долоо давж, Монгол Улсын заан хэмээх эрхэм хүндтэй цолыг хүртсэн билээ. Тэрээр зөвхөн улсын наадам төдийгүй, Монгол бөхийн өргөөнд болдог заалны барилдаануудад 32-оос олон удаа түрүүлж, орчин цагийн бөхчүүдийг амжилтаараа тэргүүлж буй үзэгчдийн хайртай хүчит бөхчүүдийн нэг юм.

2013 он: Ховд аймгийн баяр наадамд шөвгөрч "Аймгийн харцага" цол,                                    

2014 он: Ховд аймгийн баяр наадамд үзүүрлэж "Аймгийн заан" цол, тухайн жилээ Орхон аймгийн баяр наадамд 8 даван түрүүлж "Аймгийн арслан" цол,                                                 

2016 он: Ардын хувьсгалын 95 жилийн ойн баяр наадамд 6 даван шөвгөрч "Монгол Улсын харцага" цол,                                                                                                                                                  

2019 он: Ардын хувьсгалын 98 жилийн ойн баяр наадамд 5 даван шөвгөрч, дунд шөвгийн чимэг,                                                                                                                                                             

2021 он: Гиннесийн номд бүртгүүлсний 10 жилийн ойд зориулсан түүхт 512 бөхийн барилдаанд түрүүлсэн,                                                                                                                                                                      

2022 он: Ардын хувьсгалын 100, 101 жилийн ойн түүхт баяр наадамд 7 давж "Монгол Улсын заан" хэмээх эрхэм хүндтэй цолыг хүртсэн.Тэрээр зөвхөн бяр тэнхээ, уран мэхээрээ гайхагдаад зогсохгүй хэлсэн үг, гаргасан үйлдэл бүрээрээ монгол бөхийн жудаг, ёс суртахууныг үлгэрлэн харуулдаг бөх юм. Наадмын зүлэг ногоон дэвжээнээ унах, давахын алинд ч өрсөлдөгчөө хүндэтгэж, "Намайг давсан тэр бөх цаашаа улам сайн барилдаж, энэ жилийн наадамд түрүүлээсэй" хэмээн чин сэтгэлээсээ ерөөж чаддаг түүний уужуу ухаан, хөдөлмөрч даруу зан чанар нь бөх сонирхогчдын бахархлыг үргэлж төрүүлж, хайр хүндэтгэлийг нь хүлээсээр ирсэн билээ.Төрмөл бяр, уран мэх, жудагт чанараараа түмэн олноо баясгаж яваа хүчит заандаа төрсөн өдрийн халуун мэндийг дэвшүүлж, эрүүл эгнэгт, урт насалж, ирэх жилүүдийн наадмын зүлэг ногоон дэвжээндээ урамтай сайхан барилдан, цолоо ахиулахын өлзийтэй ерөөлийг өргөн дэвшүүлье!

Монгол бөхийн босоо цагаан хийморь таныг өвгөн тэтгэх болтугай!

Эх сурвалж:www.polit.mn