Х.Хатанзориг

Өнөөдөр буюу долоодугаар сарын 24-ний өдөр Монгол Улсын Арслан, Гавьяат тамирчин Дуламжавын Мөнх-Эрдэнийн төрсөн өдөр тохиож байна. Цагийг эзэлсэн Дархан аварга Бадмаанямбуугийн Бат-Эрдэнийг эрчилсэн сур шиг ид аранзал үед нь “ганхуулж” явсан бөхчүүд хуруу дарам цөөхөн. Тэдний нэг нь болж тоот бөхийн тоонд орж, торгон зодогны сэнжигнээс атган “аралцаж” явсныг түүх гэрчилнэ. Улсын баяр наадамдаа гурван удаа үзүүрлэчихээд, дөрөв дэх үзүүр түрүүны барилдаан дээрээ “Заа хүү минь, монгол хүн байна даа, Аваргын бэртэлтэй хөлтэй битгий барилдаарай” гэх аавынхаа захиасыг даган дөрвөн цаг шахам барилдахдаа гэмтэлтэй хөлөөр огтхон ч оролдолгүй өвдөг шороодчихоод “тэр жилийн наадам эцгийнхээ захиасыг биелүүлсэн наадам болсон доо” гээд хээв нэг ярьж суух жудагт Арсланг бөхөд хайртай ард түмэн минь мэдэхийн дээдээр мэднэ. Өдгөө хүртэл зодог тайлалгүй хойч үедээ үлгэр дуурайлал болон 61 насны босго дээрээ Ардын Хувьсгалын 104 жилийн ойн үндэсний их баяр наадамдаа хоёр даваад зогсож байна гэдэг биширмээрээ. Түмэнд хүндлэгдсэн Арсланг минь Монгол бөхийн босоо цагаан хийморь өнө мөнхөд ивээх болтугай. 

Эх сурвалж:www.polit.mn