М.ЧИНБИЛЭГ

“Polit.mn” сайт төрсөн өдөр буландаа төрсөн өдөр нь тохиож буй “Киви хамтлагийн дуучин Ц.Намуун”-г онцолж байна. Уран бүтээлээрээ нийтэд гарч ирээд өөрсдийн өвөрмөц төрх, шинэлэг байдлаараа цахиур хагалж чадсан охидын гайхалтай хамтлаг яах аргагүй “Киви” хамтлаг билээ. 2004 онд байгуулагдаж “Hot Line”, “Хоёр дахь хүн чинь баймааргүй байна”, “Хайр нь арыг нь даана” гэх мэт бүтээлүүдээрээ хуучин үеийг халж, шинэ үеийг бий болгож чадсан юм. Хамтлагийнхаа нүүр царай болж, стиль имижээрээ өнөөдрийг хүртэл тодорч яваа уран бүтээлч Ц.Намууныг онцолж байна. Олон нийт түүнийг МУСГЗ, Ардын жүжигчин, Хөдөлмөрийн баатар Д.Ухнаагийн зээ охин гэдгээр нь мэднэ. 1985 онд төрсөн Намуунаа нь багаасаа авьяас нь тодорч таван настайдаа “Бяцхан эстрадын дуучин” тэмцээний хүрэл медаль, Испанид болсон өсвөрийн төгөлдөр хуурчдын тэмцээний дэд байр, Парист болсон олон улсын хүүхдийн төгөлдөр хуурын тэмцээнээс Гран-при шагнал хүртэж байснаар багаасаа урлагийн хүн болох нь илэрч байсан гэдэг. 2015 онд “Киви” хамтлагийнхаа 10 жилийн ойд зориулж 5 дуу бүхий сингл цомог болох “Ганц хором” гэх бие даасан цомгоо туурвиж олны хүртээл болгожээ. Киви хамтлагт гишүүнээр элсэхээсээ өмнө загвар өмсөгч хийдэг байсан гэдэг. Намууны аавыг Африк хүн байдаг хэмээх мэдээлэл олон нийтэд байдаг ч энэ нь худал мэдээлэл аж. Түүний аав Бразил хүн байдаг ба Бразилын ерөнхийлөгчийн зөвлөхөөр ажилладаг эрхэм байдаг. Өдгөө Намуун нь “Содон Фүүдс” хэмээх группийн захирал Г.Ганбаяртай гэр бүл болж 2017 онд анхны хүүхдээ өлгийдөн авч, 2021 онд хоёр дахь хүүхдээ төрүүлжээ. Одоо тэрээр урлагаас хол сайн ээжийн албыг хашиж байгаа юм. Рок попын шинэ төрх болсон уран бүтээл Ц.Намуун танд төрсөн өдрийн мэнд хүргэе.

Эх сурвалж:www.polit.mn